MASH: Më shumë qytetarë me arsim të lartë ndërmjet 30 dhe 40 vjeç

Në vitin 2015, 29 përqind e popullatës të moshës ndërmjet 30 dhe 34 vjeç në Maqedoni kanë përfituar arsim të lartë, përkundër 12 përqindëve në vitin 2006, tregon raporti i fundit “Nga universiteti tek punësimi” i Drejtorisë për arsim pranë Komsionit evropian, kumtoi në konferencë për shtyp zëvendësministri i Arsimit dhe Shkencës, Spiro Ristovski, përcjell Telegrafi Maqedoni.

“Ky është vërtetim i efikasitetit dhe efektivitetit të strategjisë sonë për mbështetje dhe zhvillim të arsimit të lartë, për transparencë sa më të madhe të sistemit dhe nxitjes së qytetarëve për inkuadrim në të”, tha Ristovski.

Bëhet fjalë për mundësinë që persona të rritur (burra mbi 35 vjeç dhe gra mbi 30 vjeç) të regjistrihen dhe të përfundojnë studime deridiplomike. Gjatë shtatë viteve të kaluara benefitet e këtij projekti i kanë shfrytëzuar dy mijë qytetarë të Maqedonisë, njofton AIM.

Shfrytëzuesit e këtij projekti gjatë shtatë viteve të kaluara janë paraqitur për porthuajse të gjitha profesionet e ofruara në konkurse, por më së shumti për programet studimore nga shkencat teknike, natyrore-matematikore dhe mjekësore. /Telegrafi/