Marrëveshja me Italinë, mbërrijnë 27 emigrantë në Gjadër - anija ‘Spica’ sjell nga Brindisi grupin e tretë të refugjatëve

Një grup tjetër prej 27 emigrantësh mbërritën sot në Shëngjin me një anije ushtarake italiane.

Ata janë transferuar drejt kampit të Gjadrit në pritje të riatdhesimit në vendet nga kanë ardhur, raporton Top Channel.

Dje mediat fqinje raportuan se anija “Spica” e Marinës Ushtarake Italiane me rreth 30 emigrantë në bord u nis nga Porti i Brindisit drejt Qendrës së qëndrimit për riatdhesim në Gjadër.

Në bord ndodhen persona me kombësi të ndryshme. Një transferim i mëparshëm nga Brindisi ka ndodhur më 11 prill. Me mbërritjet e fundit, numri i personave të pranishëm në strukturën shqiptare do të arrijë në rreth 50.

Më parë transferimi në Shqipëri lejohej vetëm për emigrantët e ndaluar jashtë ujërave territoriale italiane apo të vendeve të tjera të BE-së, shpesh pas operacioneve të shpëtimit. Por me ndryshimet e reja ligjore, edhe personat ndaj të cilëve janë dhënë vendime të vlefshme për ndalim ose që u janë zgjatur afatet e ndalimit, mund të dërgohen në strukturat në Shqipëri.

Këto struktura janë të barasvlershme me ato të parashikuara në legjislacionin italian, pra me qendrat e pritjes dhe qendrat e qëndrimit për riatdhesim.

Ministri i Brendshëm i Italisë, Matteo Piantedosi, ka sqaruar se në Gjadër janë transferuar vetëm njerëzit me rrezik të veçantë. “Nuk është e vërtetë që ne dërgojmë atje emigrantë që janë fajtorë vetëm për faktin se janë ilegalisht në Itali. Kemi riatdhesuar njerëz që po liroheshin nga burgu për disa vite për krime të rënda, përfshirë përdhunim, pornografi me fëmijë e kështu me radhë. Pra, ne kufizojmë vetëm njerëzit që përbëjnë një rrezik shoqëror për këto qendra”, sqaroi ministri italian.

Ndërkohë, vendimi i gjyqtarëve të Gjykatës Evropiane të Drejtësisë pritet në ditët në vijim. Ata janë thirrur të shqyrtojnë apelimet paraprake të paraqitura nga Gjykata e Romës, e cila deri më tani nuk e ka njohur legjitimitetin e arrestimeve të urdhëruara kundër emigrantëve të shpëtuar në Mesdhe dhe të transferuar në anën tjetër të Adriatikut, sepse ata vijnë nga vende që qeveria italiane i konsideron të sigurta, në veçanti Egjipti dhe Bangladeshi.