Maqedoni, partitë politike vazhdojnë me fushatën zgjedhore

Partitë politike në Maqedoninë e Veriut i kanë vazhduar aktivitetet në kuadër të fushatës parazgjedhore për zgjedhjet e 15 korrikut.

Telegrafi Maqedoni ju sjell të përmbledhura aktivitetet e ditës së djeshme të partive, të cilat do të garojnë në zgjedhje më 15 korrik.

Kreu i LSDM-së, Zoran Zaev i cili udhëheq me koalicionin ‘Mundemi’ tha se më 15 korrik do të pastrohen mbetjet e regjimit në gjyqësi duke paralajmëruar pastrim të gjyqësisë nga gjyqtarët dhe prokurorët e korruptuar.

“Ato gjykatës që me vetëdije dhe me qëllim i vjetërsojnë lëndët do të shkarkohen me automatizëm që t’u lihet hapësira atyre që me nder dhe në mënyrë profesionale ta punojnë punën e tyre”, tha Zaev duke paralajmëruar kontroll të detajuar të gjendjes pronësore të gjyqtarëve dhe prokurorëve.

Kreu i OBRM-PDUKM-së, Hristijan Mickoski tha se pas 15 korrikut do të dëshmojë se si vetëm për gjashtë muaj për secilin që ka kryer krim pavarësisht nëse ka qenë pjesë e LSDM-së, OBRM-PDUKM-së, BDI-së ASH-së drejtësia do të jetë para dere.

“Unë ju premtoj drejtësi pa përjashtim. Politikani nuk do të jetë i privilegjuar. Vjen koha kur Maqedonia po rregullohet. Mjaft ishte me ndjenjën e të qenurit qytetar i rendit të dytë”, tha Mickoski duke paralajmëruar 25% rritje pagash dhe 20% rritje pensionesh.

Kandidati për kryeministër nga radhët e BDI-së, Naser Ziberi në Gostivar se si kryeministër i parë shqiptar do të jetë i të gjithëve.

“Unë dua të bashkoj shoqërinë tonë për t’u bërë më të fortë së bashku. Kjo është ajo për çfarë ka nevojë i gjithë vendi ynë dhe nuk ka vend më të mirë për të filluar sesa në vendin e punës. Kur jemi duke punuar së bashku, ndajmë të njëjtat interesa. Ne bashkohemi pas një qëllimi që është suksesi i kompanisë apo pagat më të larta”, tha Ziberi duke thënë se Maqedonia e Veriut është vend multi etnik por deri tani është bllokuar përmes konflikteve ndëretnike, pabarazisë dhe diskriminimit.

Koalicioni ASH dhe Alternativa gjatë ditës së djeshme vizituan fshatrat malore të Tetovës Lisec dhe Shipkovicë duke prezantuar kështu platformën e tyre politike.

Kreu i ASH-së, Ziadin Sela theksoi se tani është koha për ndryshime, duke nisura nga Ligji për përfaqësim adekuat, oferta ekonomike dhe zhvillim ekonomik, si dhe për padrejtësitë e bëra ndaj shqiptarëve ndër vite që nuk janë mbrojtur si duhet nga institucionet gjyqësore./Telegrafi/