Malazezët i sulmuan dhe fyen, Llapi liron biletat dhe kërkon përkrahje të madhe

Llapi ka vendosur për çmime të lira të biletave për ndeshjen me Buducnostin, që zhvillohet javën e ardhshme në “Fadil Vokrri”.

Llapjanët synojnë ta mbushin stadiumin në Prishtinë, për ndeshjen e kthimit të raundit të parë kualifikues të Ligës së Konferencës, pasi të enjten mbrëma humbën me rezultat 2-0 në Podgoricë.

Tifozët vendas kanë shpalosur koreografi anti-shqiptare dhe ka pasur edhe hedhje të gjësendeve nga tifozët e Buducnostit në drejtim të bankinës së Llapit.

Llapi ka vendosur që çmimi i biletës për ndeshje të jetë një euro, për tribunat pas portës. Për tribunën lindore, çmimi i biletës është dy euro. Ndërsa për perëndim, bileta do të kushtojë tri euro. Biletat VIP do të kenë çmimi prej pesë euro.

“Kryesia e klubit merr vendim që në ndeshjen kthyese më 14 korrik në ‘Fadil Vokrri’ të ketë bileta me çmime solide, vetëm që stadiumi të jetë i stërmbushur ndaj atyre që treguan urrejtje jo vetëm ndaj nesh, por ndaj gjithë kombit shqiptar, në ndeshjen e zhvilluar mbrëmë në Podgoricë”, thuhet në njoftimin e Llapit.

Ndeshja mes Llapit dh Buducnostit zhvillohet javën e ardhshme/Telegrafi/