Makerspace Innovation Center Prizren mbështet ndërmarrësit e rinj me Startup Bootcamp, ofron trajnime e mentorim

Makerspace Innovation Center Prizren ka hapur thirrjen për aplikime për në Startup Bootcamp.

Sipas njoftimit ky është një aktivitet edukativ tre-ditor, i krijuar për individët dhe ekipet që kanë ide të biznesit dhe dëshirojnë të mësojnë si t’i zhvillojnë ato më tej.

Ky aktivitet parashihet të mbahet nga 21 deri më 23 shkurt 2025 në Parkun e Inovacionit dhe Trajnimit në Prizren.

“Startup Bootcamp ka për qëllim t’i ndihmojë të gjithë ata që dëshirojnë ti transformojnë idetë e tyre në koncepte të strukturuara dhe të qëndrueshme”, thuhet në njoftimin e Makerspace Innovation Center Prizren.

Gjatë këtij aktiviteti, sipas njoftimit, fokus të veçantë do të kenë punëtoritë të cilat kanë për qëllim avancimin e ideve të pjesëmarrësve.

“Startup Bootcamp përfshin trajnime dhe punëtori të udhëhequra nga mentorë dhe ekspertë të industrisë, duke siguruar një përvojë gjithëpërfshirëse dhe interaktive. Çdo pjesëmarrës/e do të marrë vlerësime të personalizuara dhe udhëzime për zhvillimin e mëtejshëm të idesë së tij/saj”, thuhet në njoftim.

Aty theksohet se pjesëmarrësit do të mësojnë se si ti validojnë idetë dhe të sigurohen që ato kanë potencial tregu; si të krijojnë një model biznesi të strukturuar, që mbështet zhvillimin e suksesshëm; si të ndërtohet një ekip efektiv; si të prezantohet ideja (pitching) me besim dhe qartësi për të tërhequr investitorë apo partnerë, etj.

“Startup Bootcamp është gjithashtu një mundësi e shkëlqyer për t’i ndihmuar pjesëmarrësit ta kuptojnë më mirë natyrën dhe përmbajtjen e inkubatorit “Idea-to-Scale”, duke i njoftuar për mundësitë që i ofron ky program”, thuhet në njoftim.

Gjithashtu është theksuar se thirrja është e hapur për individët dhe ekipet nga Komuna e Prizrenit dhe rajoni përreth, përfshirë Mamushën, Dragashin, Malishevën dhe Suharekën

Të interesuarit për këtë aktivitet duhet të jenë mbi moshën 18 vjeç; të kenë një ide biznesi në fazat e hershme të zhvillimit; të jenë të gatshëm për të marrë pjesë fizikisht përgjatë tri ditëve të bootcamp-it.

Aplikimet janë të hapura deri më 16 shkurt 2025, derisa pjesëmarrja në këtë aktivitet është falas.

Ky aktivitet implementohet nga Makerspace Innovation Center Prizren dhe mbështetet nga GIZ Kosovo dhe ITP Prizren. /Telegrafi/