Sot zyrtarisht ka nisur sezona e re e Superligës Kineze, dhe që në fillim duket se mund të jetë një nga sezonet më të çuditshme në botën e futbollit këtë vit.
Më shumë se gjysma e ekipeve, saktësisht 9 nga 16, nisin sezonin me pikë negative për shkak të shkeljeve të lidhura me rregullimin e ndeshjeve, bixhozin dhe korrupsionin.
Në janar të këtij viti, autoritetet kineze shpallën sanksione të mëdha: gjithsej 73 persona morën ndalim të përjetshëm për të punuar në futbollin kinez, ndërsa 13 klube nga dy ligat më të larta profesionale u dënuan me heqje pikësh para fillimit të sezonit.
Më të prekur janë Shanghai Shenhua dhe Tianjin Jinmen Tiger, të cilët humbën nga 10 pikë për shkak të shkeljeve.
Kampionët e vitit 2025, Shanghai Port, si dhe ekipet Beijing Guoan dhe Zhejiang, u dënuan me nga 5 pikë.
Edhe klubet e niveleve më të ulëta, si Changchun Yatai dhe Meizhou Hakka, që ranë nga Superliga sezonin e kaluar, morën dënime nga katër dhe tre pikë.
Përveç heqjes së pikëve, të gjithë klubet e ndëshkuara u penalizuan edhe financiarisht, gjobat variojnë nga 200.000 deri në 1 milion yuan (rreth 21.000 deri në 105.000 euro).
Këto sanksione, duke përfshirë ndalime të përjetshme, janë pasojë e shkeljeve historike që datojnë deri në vitin 2012.
Mes personave që morën ndalim të përjetshëm janë ish-trajneri i përfaqësueses kineze, Li Tie, i cili në dhjetor 2024 u dënua me 20 vite burg për korrupsion, ish-presidenti i Federatës Kineze të Futbollit, Chen Xuyuan, që po kryen një burgim të përjetshëm për marrje ryshfeti, dhe ish-internacionali kinez Wang Dong, kampion i Superligës në 2007 me Changchun Yatai, i cili gjatë karrierës luajti edhe për Chongqing Lifan, Tianjin TEDA dhe Qingdao Huanghai.
Këto masa shkaktuan tronditje në futbollin kinez dhe tërhoqën vëmendjen e mediave ndërkombëtare.
Me më shumë se gjysmën e ekipeve që fillojnë sezonin me pikë negative, sezona 2026 premton një garë jashtëzakonisht të paparashikueshme për titullin dhe mbijetesën. /Telegrafi/
