Legjenda e Barcelonës thotë se Vinicius Jr duhet të ndryshojë sjelljen e tij për të heshtur kritikët

Ish-qendërmbrojtësi i Barcelonës, Carles Puyol, i ka bërë thirrje Vinicius Jr që të fokusohet në futboll pas kritikave për sjelljet e brazilianit në fushë.

Vinicius ka përfunduar në krye të ballinës në shumë media, duke tërhequr zemërimin e lojtarëve rivalë dhe tifozëve për veprimet e tij në fushë dhe Puyol ka dhënë mendimin e tij për këtë çështje, duke pretenduar se Vinicius duhet të fokusohet në atë që mund të bëjë me topin.

“Do të doja të flisja me të si një shok skuadre dhe t’i tregoja se çfarë mendoj dhe ndjej. Ai është një lojtar i madh që bën ndryshimin dhe që duhet të admirohet. Nëse do të ndryshonte sjelljen e tij, do të kishte më shumë lëvdata”, ka thënë Puyol para gazetarëve.

Trajneri i Real Madridit, Carlo Ancelotti e ka mbështetur vazhdimisht Vinicius përballë komenteve dhe kritikave, ku së fundmi ka pretenduar se ndaj anësorit ishte treguar ‘mosrespekt’ në fitoren 2-0 të Madridit ndaj Athletic Bilbaos në janar.

Braziliani ishte lojtari më i faulluar në elitën e futbollit spanjoll edicionin që lamë pas dhe shpeshherë është ankuar se ai nuk po mbrohet nga gjyqtarët.

Përndryshe, Vinicius pritet ta nis nga fillimi ndeshjen që Real Madridi e luan të mërkurën ndaj Bragas në Ligën e Kampionëve aty ku i duhet të paktën një pikë për të siguruar matematikisht kalimin në fazën eliminatore./Telegrafi/