Një metodë e pazakontë që premton lëkurë më të pastër, më të ndritshme dhe më të shëndetshme
Rutina japoneze e bukurisë është prej kohësh e njohur për hapa të thjeshtë, por efektivë, që i japin lëkurës një pamje të shëndetshme dhe të mirëmbajtur. Një nga trendët që së fundmi ka tërhequr shumë vëmendje është larja e fytyrës me ujë të gazuar. Kjo metodë, e cila shfrytëzon fuqinë e flluskave të imëta, premton pastrim më të thellë të poreve, eksfolim të butë dhe një ten të freskët me shkëlqim natyral.
Pse pikërisht uji i gazuar?
Uji i gazuar përmban dioksid karboni, i cili krijon flluska përgjegjëse për pastrimin e butë, por tërësor të lëkurës. Ato ndihmojnë në nxjerrjen nga poret të papastërtive, tepricës së sebumit dhe mbetjeve të grimit. Përveç kësaj, acidi karbonik në ujin e gazuar ka një pH lehtësisht acid, rreth 5.5, që është më afër pH-së natyrale të lëkurës sesa uji i zakonshëm i rubinetit.
Ky ekuilibër mund të nënkuptojë më pak tharje dhe irritime, ndërsa përmirësimi i qarkullimit të gjakut kontribuon në një pamje më të freskët dhe më të shëndetshme të fytyrës, transmeton Telegrafi.
Përfitimet e larjes së fytyrës me ujë të gazuar
Pastrimi i thellë i poreve:
Flluskat veprojnë duke ngritur dhe larguar papastërtitë, yndyrën dhe ndotjet që grumbullohen thellë në pore.
Eksfolim i butë:
Karbonizimi funksionon si furça mikroskopike që heqin qelizat e vdekura të lëkurës, pa fërkim të ashpër.
Qarkullim më i mirë i gjakut:
Kontakti i lëkurës me ujin e gazuar mund të zgjerojë enët e vogla të gjakut, duke rritur furnizimin me oksigjen dhe lëndë ushqyese.
Ten më i ndritshëm dhe më i njëtrajtshëm:
Falë qarkullimit më të mirë, lëkura mund të duket më e shëndetshme, më e freskët dhe më rrezatuese.
pH më natyral për lëkurën:
Vlera lehtësisht acide e ujit të gazuar është më pak agresive se ajo e ujit të rubinetit, duke e bërë më të përshtatshëm për kujdes të përditshëm.
Çfarë duhet të bëni?
Përdorni ujë mineral natyral të gazuar. Shmangni variantet e ëmbëlsuara ose të aromatizuara.
Hidhni ujin e gazuar në një enë të pastër. Është e rëndësishme të mos përdorni lavamanin, për të shmangur kontaktin me bakteret.
Zhytni fytyrën në ujë për rreth 10 sekonda, duke marrë frymë përmes hundës, ose spërkateni butësisht fytyrën me ujë.
Më pas mund të përdorni xhelin ose shkumën tuaj të zakonshme për larje, ose ta shpëlani sërish fytyrën me ujë të gazuar.
Disa e përdorin këtë hap si tonik, ndërsa të tjerë në fund e shpëlajnë fytyrën me ujë të zakonshëm.
Çfarë duhet pasur parasysh?
Kjo metodë duhet të jetë një shtesë në rutinën e kujdesit për lëkurën, jo zëvendësim i pastrimit klasik të fytyrës. Nëse keni lëkurë shumë të ndjeshme, filloni me kujdes, pasi flluskat mund të shkaktojnë irritim të lehtë.
Gjithmonë përdorni një enë të veçantë dhe të pastër për të ulur rrezikun e transferimit të baktereve.
Larja e fytyrës me ujë të gazuar mund të tingëllojë e pazakontë, por pikërisht në këtë thjeshtësi qëndron edhe popullariteti i saj. Ashtu si me çdo trend bukurie, çelësi është përdorimi i saktë dhe i moderuar, duke dëgjuar me kujdes nevojat e vetë lëkurës. /Telegrafi/
