Kuvendi Komunal në Kamenicë miraton buxhetin me vlerë 15 milionë euro

Kuvendi Komunal në Kamenicë ka mbajtur një mbledhje të jashtëzakonshme, ku me shumicë votash është miratuar Draft-Buxheti Komunal për vitin 2025.

Buxheti i miratuar ka një vlerë totale prej 15,282,642 Euro.

“Propozim-Vendim për shqyrtimin dhe aprovimin e Draft-Buxhetit Komunal për vitin 2025, Propozim-Vendim për transfer dhe rialokim të mjeteve financiare, Propozim-Vendim për krijimin e kodit për projektet me participim me donatorë, Propozim-Vendim për hapjen e shqyrtimit publik të projekt-dokumentit të Planit Zhvillimor Komunal 2024-2032”, ishin pikat kryesore për shqyrtim në rend të ditës.

Gjatë diskutimeve në Kuvend, u theksua rëndësia e miratimit të Draft-Buxhetit Komunal për vitin e ardhshëm, i cili do të mundësojë zbatimin e projekteve zhvillimore dhe përmirësimin e shërbimeve publike për qytetarët e komunës. Miratimi i këtij buxheti pritet të ndikojë pozitivisht në realizimin e investimeve kapitale dhe të projekteve të tjera me rëndësi për zhvillimin lokal.

Gjithashtu, u diskutua dhe miratua edhe krijimi i kodit për projektet me participim të donatorëve, i cili do të lehtësojë bashkëpunimin me organizata të ndryshme ndërkombëtare dhe donatorë për financimin dhe realizimin e projekteve zhvillimore në komunë.

Në përmbyllje të seancës, u vendos që projekt-dokumenti i Planit Zhvillimor Komunal për periudhën 2024-2032 të kalojë në shqyrtim publik, për të marrë sugjerime dhe rekomandime nga qytetarët dhe aktorët e tjerë të interesuar para miratimit përfundimtar. /Telegrafi/