​Kusari-Lila: U pa se ka hapësirë të rishikohen masat kufizuese

Ushtruesja e detyrës së shefes së grupit parlamentar të Lëvizjes Vetëvendosje, Mimoza-Kusari-Lila ka arsyetuar fluksin e madh të qytetarëve drejt Shqipërisë, duke thënë se edhe në të kaluarën kanë ndodhur lëvizje të tilla.

Kusari Lila ka thënë se ajo çka u pa në këtë javë, tregon se ka hapësirë të rishikohen masat, përfshirë edhe testimin.

“Unë mendoj se këto masa, pas zbatimit të javës së parë, kanë treguar se kanë nevojë të rishikohen duke marrë parasysh dy komponente: Komponenti i parë është se atë se sa ka efekt një mbyllje e pjesërishme dhe a duhet të shkohet në një mbyllje totale siç po ndodh shembull me Gjermaninë ose me shtetet e tjera të zhvilluara si Kanadaja”, thotë Kusari-Lila në RTV Dukagjini.

“Unë besoj dhe konsideroj se pas asaj që pamë këtë fundjavë ka hapësirë të mjaftueshme për tu rishikuar masat, përfshirë këtu edhe testimin [për qytetarët që dalin nga vendi]”, tha ajo.

Mimoza Kusari-Lila ka arsyetuar lëvizjen e një mase të madhe të qytetarëve drejt Shqipërisë.

“Edhe në vitet e kaluara rreth 30 mijë kosovarë kanë udhëtuar drejtë Shqipërisë në këtë periudhë kohore. Kjo ka qenë fundjava e fundit para Ramazanit. Edhe në të kaluarën trendi i lëvizjes ka qenë i njëjtë”, tha ajo./Telegrafi/