Kurti në KS të OKB-së: Regjimi autoritar serb po bën spastrim etnik në Luginë, i ka bërë shqiptarët pa shtet

Në një debat të ngarkuar nga tensionet e vazhdueshme dhe të acaruara nga deklaratat e rënda politike, kryeministri i Kosovës, Albin Kurti, ka ofruar një përgjigje të fortë dhe të prerë ndaj akuzave të hedhura nga presidenti i Serbisë në seancën e fundit të Këshillin e Sigurimit të OKB-së.

Kurti ka hedhur poshtë çdo pretendim që sugjeron se Kosova është përfshirë në një politikë të spastrimit etnik ndaj pakicës serbe.

“Nuk ka vend për gënjeshtra në dialogun ndërkombëtar,” theksoi kryeministri Kurti.

“Akuzat e ngritura nga ana e Serbisë janë jo vetëm të pabazuara, por edhe të paarsyeshme në kohë dhe në kontekst”, u shpreh ai.

Ai vijoi të ilustrojë me fakte dhe dëshmi të qarta se si përpjekjet e Kosovës kanë qenë konsistentisht në drejtim të paqes, stabilitetit dhe respektimit të të drejtave të të gjitha komuniteteve që jetojnë brenda kufijve të saj.

Kurti ka përmendur gjithashtu historinë e fundit të konfliktit në Ballkan, duke përkujtuar se është Serbia ajo e cila është dënuar nga bashkësia ndërkombëtare për veprat e gjenocidit gjatë viteve të ’90-ta.

“Të harruarit e historisë është një luks që nuk mund ta përballojmë,” deklaroi ai, “dhe të përsëriturit e historisë është një gabim që nuk do t’i lejojmë.”

Duke mbyllur fjalimin e tij, Kurti u bëri thirrje të gjitha palëve të përfshira dhe bashkësisë ndërkombëtare të punojnë së bashku drejt një të ardhmeje ku e vërteta dhe drejtësia janë vlerat që udhëheqin rrugën drejt pajtimit dhe bashkëjetesës.

Kryeminsitri foli edhe për fushatën e spastrimit etnik që bëhet në mënyrë administrative, ndaj shqiptarëve në Luginë.

Kreu i shtetit theksoi se Qeveria serbe sistematikisht i ka hequr mbi 4.200 shqiptarë nga regjistri civil, në Medvegjë, dhe mbi 2.000 në Bujanovc.

“Kjo shlyerje nga regjistri ka pasoja të prekshme, pasi shqiptarët më nuk kanë qasje në letërnjoftime, pasaporta, shërbime familjare, ndihmë sociale, regjistrim të veturave, transaksione, pensione dhe të drejtë votimi.

“Kjo i bënë ata pa shtet. Kjo lloj fushate është metodë e de popullimit të shqiptarëve. Shqiptarët atje, nuk janë shënjestra e vetme e regjimit autoritar të Serbisë, me 2 janar të këtij viti The Guardian e ka përshkruar këtë si kapje e shtetit”, u shpreh Kurti.

Tutje tha se Parlamenti Evropian, miratoi me shumicë dërmuese një rezolutë që bën thirrje për hetim ndërkombëtarë në parregullsitë e zgjedhjeve që janë mbajtur në dhjetor, duke përmendur manipulimin e zgjedhjeve, abuzime verbale dhe mediat ruse që janë angazhuar në keqinformim në emër të Qeverisë së Serbisë.

Kurti ritheksoi se Serbia është përafruar me Rusinë – është i vetmi vend evropian përveç Bjellorusisë që nuk ka vendosur sanksione, pas sulmit të Vladimir Putin në Ukrainë, dhe vepron si Kalë Troje i Putinit në Ballkan, ndaj botës demokratike./Telegrafi/