Kujdestari 24-orëshe për barnatoret në Prishtinë, reagon AKPPM: Rregullorja përfshin shitoret, jo institucionet shëndetësore

Kuvendi Komunal i Prishtinës ditë më parë me shumicë votash ka miratuar ndryshim-plotësimin e rregullores për fillimin dhe mbarimin e orarit të punës së organizatave të biznesit në kryeqytet.

Sipas njoftimit, në këtë ndryshim sqarohet se nga tetori, në 5 barnatore të kryeqytetit do të ketë kujdestari me orar të plotë (24 orë).

E lidhur me këtë ka reaguar Agjencia e Kosovës për Produkte dhe Pajisje Medicinale.

Në reagim AKPPM thekson se arsyetimi i Drejtoratit të Shëndetësisë së Komunës së Prishtinës duke u thirrur në nenin 40 të Ligjit për Tregtinë e Brendshme Nr.2004/18 është munduar ta arsyetoj Rregulloren për përcaktimin e orarit të punës dhe kujdestarive të Barnatoreve duke i cilësuar ato si “Shitore” nuk ka bazë ligjore sepse ky Ligj nuk ngërthen në vete institucione shëndetësore (Barnatoret).

Lexo po ashtu Vendoset kujdestari 24-orëshe për barnatoret në Prishtinë

Sipas AKPPM-së, bazuar në Legjislacionin aktual në fuqi fushëveprimtaria e barnatoreve është e rregulluar me tri Ligje dhe një Udhëzim Administrativ:

Bazuar në Ligjin për Shëndetësi 04/L-125, barnatoret janë institucione shëndetësore, personeli që punon në Barnatore është staf profesional shëndetësor.

Bazuar në Ligjin për Produkte dhe Pajisje Medicinae 04/L-190, Barnatoret licencohen nga AKPPM-ja dhe po ashtu mbikëqyren dhe inspektohen në çdo kohë nga Inspektorati Farmaceutik në kuadër të Ministrisë së Shëndetësisë.

Po ashtu sipas këtij Ligji, kushtet për veprimtarinë e Barnatoreve përcaktohen me akt nënligjor. Ekziston Udhëzimi Administrativ 11/2015 për Qarkulluesit me Pakicë ku me rastin e licencimit të Barnatoreve një nga kushtet për licencim është njoftimi për orar i vendosur në hyrje të Barnatores.

Bazuar në Ligjin 08/L-047 Për Ndryshimin dhe Plotësimin e Ligjit për Produkte dhe Pajisje Medicinae 04/L-190, autoritet i vetëm kompetent për shqiptimin e gjobave në tregun Farmaceutik përfshi këtu edhe Barnatoret si institucione shëndetësore është Inspektorati Farmaceutik i Ministrisë së Shëndetësisë.

Bazuar në Planin Legjislativ të MSH-së është përfshirë Plotësim/Ndryshimi i Udhëzimi Administrativ 11/2015 për Qarkulluesit me Pakicë, ku Zyrtari përgjegjës dhe Grupi punues kanë përcaktuar oraret dhe kujdestaritë e Institucioneve Shëndetësore në nivel vendi.

“Andaj kërkojmë që Drejtorati i Shëndetësisë së Komunës së Prishtinës të tërhiqet nga tendencat për marrje të kompetencave të nivelit qendror. Ky është qëndrimi zyrtar dhe përgjigjja e fundit nga AKPPM-ja lidhur me këtë çështje”, thuhet më tej. /Telegrafi/