Kryesia e Kuvendit diskuton për fillimin e punës së ekipit për reformën zgjedhore – LVV do të ketë numrin më të madh të anëtarëve

Shefja e Grupit Parlamentar të LVV-së, Mimoza Kusari-Lila pas mbledhjes së Kryesisë së Kuvendit, ka deklaruar se është marrë vendim që seanca e re e Kuvendit të mbahet më 19 maj me fillim në ora 10:00.

“Pas përmbylljes së pikave të seancës së re, do të fillohet me vazhdimin e seancës së papërfunduar konkretisht me debatin parlamentar për siguri të kërkuar javë më parë nga AAK, por që me dakordim në seancat e kaluara plenare është shtyre për një ditë tjetër”, ka thënë Kusari-Lila.

Kusari-Lila gjithashtu bëri të ditur se sot kanë diskutuar edhe për konstituimin dhe fillimin e punës së ekipit për reformën zgjedhore.

“Jemi dakorduar gjithashtu që në mbledhjen e ardhshme të kryesisë t’i kemi të gatshëm emrat e anëtarëve që do të marrin pjesë në ekipin për reformën zgjedhore”, tha ajo.

Shefja e Grupit Parlamentar të LVV-së bëri të ditur se formula e përbërjes së këtij ekipi është e ngjashëm me atë të Komisioneve Parlamentare, ku LVV do t’i ketë 5 anëtarë, PDK 2, LDK 1, AAK 1, Grupi Multietnik 1 dhe Lista Serbe 1 anëtarë. /Telegrafi/