Kryeministri i Holandës konfirmon anulimin e Eredivisie: Nuk zhvillohet futbolli deri më 1 shtator

Sezoni i Eredivisie ka përfunduar, pasi kryeministri holandez Mark Rutte njoftoi se të gjitha ngjarjet publike janë të ndaluara – madje edhe pas dyerve të mbyllura – deri më 1 shtator.

Kryeministri Mark Rutte mbajti një konferencë për shtyp këtë mbrëmje për të zgjatur urdhrin e bllokimit nga 1 qershori deri në 1 shtator, i imponuar për shkak të shpërthimit të coronavirusit.

Klubet e elitës holandeze nuk mund të luajnë as pas dyerve të mbyllura, sepse policia do të duhet të jetë e pranishme nëpër ndeshje.

Federata Holandeze e Futbollit (KNVB) do të bëjë deklaratën e vet duke deklaruar pashmangshëm mbylljen e sezonit 2019-20.

Kjo vjen vetëm disa orë pasi UEFA lëshoi ​​një komunikatë duke konfirmuar se ata do të lejonin disa kampionate të përfundonin më herët.

Për dallim nga Jupiler Pro League e Belgjikës, ku Club Brugge tashmë kishte fituar titullin dhe kishte vetëm një ndeshje drejt fundit të sezonit të rregullt, Eredivisie ka edhe nëntë ndeshje të mbetura.

Ajax dhe AZ Alkmaar janë në krye të renditjes bashkë me nga 56 pikë nga 25 ndeshje, kështu që nuk është e qartë se si do të vendosin për një fitues, ose nëse titulli do të caktohet. /Telegrafi/