Krahasimin e Donetskut dhe Luhanskut me rastin e Kosovës, Reka e quan analogji false të Putinit

Publicisti dhe ish-diplomati, Blerim Reka, ka reaguar pas deklarimeve të presidentit rus, Vladimir Putin, në takimin e së martës me Sekretarin e Përgjithshëm të OKB-së,  Antonio Guterres, ku presidenti rus ka thënë se Donetsku e Luhansku janë bërë shtete të pavarura sipas analogjisë së vendimit të Gjykatës Ndërkombëtare të Drejtësisë në rastin e Kosovës.

Reka, ka thënë se analogjinë e mëhershme false të “Krimesë me Kosovën”, dje Putini e “begatoi” edhe me atë të Donbasit.

“Në takimin me sekretarin e përgjithshëm të OKB-së Guterres, ai u mundua ta shes krahasimin e paqëndrueshëm të dy rasteve krejtësisht të ndryshme”, ka shkruar Reka në një postim në Facebook, transmeton Telegrafi.

“Pavarësia e Kosovës lindi nga lufta çlirimtare kundër një shteti të huaj pushtues që ushtronte apartheid dhe gjenocid kundër popullatës shqiptare. Ndërkaq, Kremlini njohu njëanshëm ‘pavarësinë’ e Krimesë, Donetskut e Luganskut për t’i bashkuar Rusisë. Kosova, pra luftoi për çlirim kundër shtetit të huaj (Serbisë), duke e mbrojtur territorin e vet nga ky pushtim. Krimea dhe Donbasi, ndërkaq u ‘pavarësuan’ me pushtimin nga një shtet i huaj (Rusia) duke shkëputur territor të Ukrainës”, ka shkruar Reka.

Lexo po ashtu Putin përmend sërish Kosovën, tenton ta krahasojë me agresionin e tij ushtarak në Ukrainë

Më tej ai ka thënë se “jo se këto nuk i din presidenti i njërit nga 5 shtetet-anëtare të përhershme të Këshillit të Sigurimit. Aq më tepër që edhe Gjykata Ndërkombëtare e Drejtësisë i dallon qartë këto dy raste, duke vendosur ndryshe. Në vitin 2010, GJND-ja konkludoi se pavarësia e Kosovës nuk e shkeli të drejtën ndërkombëtare. Po kjo gjykatë e OKB-së muajin e kaluar, e dënoi invazionin rus në Ukrainë, si shkelje të së drejtës ndërkombëtare”.

“Më qartë se kaq shëndosh. Mirëpo, ‘analogjia’ e Putinit synon mbajtjen e Serbisë në orbitën ruse para ‘hapjes së letrave’ në ‘pokerin e madh’ në East River. Kuptohet, nëse ndërkohë, ai nuk gjykohet për krime lufte”, ka shkruar Reka.

Putin në takim me Sekretarin e Përgjithshëm të OKB-së, Antonio Guterres, ka thënë se ka lexuar personalisht vendimin e GJND-së për Kosovën dhe se me atë rast GJND-ja ka krijuar precedent dhe bazuar në këtë edhe Republika e Donetskut dhe e Luhanskut mund ta shpallin pavarësinë.

Donetsku e Luhansku janë dy territore separatiste në lindje të Ukrainës, pavarësinë e të cilave e ka njohur Rusia. /Telegrafi/