KQZ: Në shtatë qendra votimi në Tiranë e Durrës ka njerëz të paautorizuar, të largohen menjëherë

Kryetari i Komisionit Qendror të Zgjedhjeve në Shqipëri, Ilirjan Celibashi, ka deklaruar se në shtatë qendra të votimit në Tiranë dhe Durrës po qëndrojnë persona të paautorizuar.

Ai ka dhënë urdhër që të gjithë këta individë të largohen menjëher nga qendrat e votimit, në të kundërtën kush refuzon, kryekomisioneri paralajmëroi se ndaj tyre do të merren masa.

“Ka prani në ambiente të personave të paautorizuar, ne e konsiderojmë si intimidim dhe presion ndaj është rasti që autoritetet ligjzbatuese nga Policia apo KZAZ dhe KQV ta adresojnë dhe të merren mesat përkatëse. Është e papranueshme që qytetarë që nuk ka lidhje, të rrinë në ambientet e brendshme, duhet të boshatisen menjëherë dhe kushdo që refuzon, do duhet të mbajë përgjegjësi”, ka thënë ai, raportoi A2CNN.

Ai shtoi se nuk ka asnjë informacion se cilat parti politike i përfaqësojnë këta persona të paautorizuar.

“Nuk e dimë se cilën parti përfaqësojnë ata”, shtoi kryekomisioneri.

Në zbatim të këtij vendimi të marrë nga KQZ-ja, autoritetet kanë shkuar në qendrat e votimit ku dyshohet se po qëndrojnë këta persona të paautorizuar dhe po e bëjnë lirimin e hapësirave prej tyre.