Lajme Kosovë

Kosova i refuzoi donacionet e vaksinave antiCOVID, kryeministri bullgar kishte deklaruar se së shpejti do tu kalonte afati

Para 3 vitesh

Në korrik të këtij viti, kryeministri në detyrë i Bullgarisë, Stefan Yanev kishte deklaruar se Qeveria bullgare do të merrte vendim se cilit shtet do t’i dhuronte një sasi vaksinash anti-COVID, të cilave së shpejti do tu skadonte afati.

Sipas raportimeve të medieve të huaja, deri në korrik, Bullgaria kishte pranuar 4.8 milionë doza të vaksinës, por i kishte administruar vetëm 1.8 milionë.

E një pjesë e këtyre vaksinave, siç mëson Telegrafi ishin të destinuara si donacion për Republikën e Kosovës, të cilat u refuzuan nga institucionet e vendit tonë.

Siç sqaroi një ditë më parë ministri i Shëndetësisë, Arben Vitia, pikërisht për shkak të afatit të afërt të skadencës, në korrik të këtij viti janë refuzuar disa donacione nga vendet e BE-së.

Vitia ka bërë të ditur se refuzimi i këtyre vaksinave është bërë me rekomandim të Komitetit të Vaksinimit.

Sipas ministrit Vitia, donacionet janë refuzuar për shkak se afati i skadencës nuk ishte i mjaftueshëm për të garantuar se do të mund të shfrytëzoheshin për t’i vaksinuar qytetarët.

“Janë refuzuar disa donacione, për të vetmen arsye sepse komiteti i vaksinimit është një trup profesionale. Kanë qenë oferta për vaksina Astrazeneca, pas donacionit nga Norvegjia, që kanë pasur një afat skadencë jo optimal që do të na kishte garantuar që t’i administrojmë tek qytetarët tanë. Me rekomandim të Komitetit të Vaksinimit, natyrisht ne i kemi falënderuar dhe i kemi refuzuar për shkaqe të cilat i përmendëm”, tha Vitia.

Ndryshe, Vitia në një konferencë për media ka bërë të ditur se janë hequr nga administrimi mbi 133 mijë vaksina AstraZeneca pas skadimit të afatit, vaksina këto të cilat ishin donacion nga Norvegjia.

“Sot kemi hequr nga administrimi 133 mijë 234 Vaksina nga kompania AstraZenca pjesë e donacionit nga Norvegjia që ju ka skaduar afati. Si ministri kemi njoftuar se afati i tyre është 31 gushti i këtij viti”, tha Vitia.

Ministri shtoi se ka pasur shumë dezinformata përfshirë këtu edhe nga deputetë të Kuvendit për afatin e këtyre vaksinave.

“Përveç të tjerash kjo ka ndodhur dukshëm në uljen e interesimit të qytetarëve për të marrë këtë vaksinë. Në ballafaqim me pandeminë dhe pas përhapjes së variantit Delta ne nuk jemi në situatë për të zgjedhur vaksina sidomos kur ato janë të sigurta”, u shpreh Vitia.

Vitia shtoi se vaksinat që janë në stoqe tona janë vaksina të sigurta.

“Ju siguroj se aktualisht kemi mjaftueshëm vaksina dhe nuk do të lejojmë që stoqet tona të mbesin pa to asnjë moment. Presim në fund të kësaj jave ose në fillim të javës tjetër 150 mijë vaksina nga Gjermania dhe në javën e tretë të shtatorit edhe 100 mijë vaksina nga Italia. Edhe këto vaksina janë AstraZeneca me afat deri në nëntor të këtij viti”, ka thënë Vitia.

Ai shtoi se në fillim të javës tjetër pritet të vijnë edhe pjesa tjetër e vaksinave Pfizer përmes COVAX nga donacioni i SHBA-ve prej 500 mijë dozave, dhe mbi 200 mijë doza nga kontrata bilaterale që kemi me Pfizer.