Kosova dhe Franca intensifikojnë bashkëpunimin në fushën e sigurisë

Ministri i Forcës së Sigurisë së Kosovës, Rrustem Berisha priti sot në takim një delegacion të lartë të shtetit francez.

Në këtë takim i pranishëm ishte edhe ambasadori francez, Dider Chabert i cili e njoftoi ministrin Berisha me emërimin e atasheut të Mbrojtjes dhe akreditimin e tij për Kosovë, kolonel Fabrice Duda, si dhe paralajmëroi intensifikimin e bashkëpunimit në fushën e sigurisë.

Berisha me këtë rast falënderoi ambasadorin francez Didier Chabert për mbështetjen dhe përkrahjen që shteti i Francës ka ofruar për Kosovën në shumë fusha si: politikë, siguri, etj., duke filluar që nga kontributi i Francës në kuadër të KFOR-it, kontributi në administratë e në fusha tjera.

Ministri Berisha gjithashtu e njoftoi diplomatin francez mbi zhvillimet në sektorin e sigurisë në Kosovë, integrimin e komunitetit jo shumicë, si dhe për planet për të ardhmen.

Berisha në veçanti çmoi lartë angazhimin e Francës në intensifikimin e bashkëpunimit në fushën e sigurisë, me akreditimin për herë të parë të atasheut të Mbrojtjes për Kosovë, si dhe angazhimin e vazhdueshëm për avancimin e marrëdhënieve në këtë fushë.

Ndërkaq, ambasadori i Francës në Kosovë, Didier Chabert e përgëzoi ministrin për të arriturat dhe për kultivimin e një bashkëpunimi të vazhdueshëm ndërmjet dy vendeve.

Ambasadori e njoftoi ministrin Berisha me emërimin e atasheut të Mbrojtjes dhe akreditimin e tij për Kosovë, kolonel Fabrice Duda, si dhe paralajmëroi intensifikimin e bashkëpunimit në fushën e sigurisë.

Ambasadori Chabert gjithashtu paralajmëroi vizitën zyrtare në MFSK të Sekretares së shtetit pranë Ministrisë së Armatave në Qeverinë e Francës që do të zhvillohet së shpejti, vizitë kjo që pason vizitën e ministrit Berisha në Francë në vitin e kaluar.

Ministri Berisha si dhe ambasadori Chabert shprehën gatishmërinë e dy vendeve për një bashkëpunim dhe intensifikim të tij në fushën e sigurisë në të ardhmen, që për Republikën e Kosovës është jashtëzakonisht me interes, duke ditur rolin e Francës në Evropë si në Bashkim Evropian dhe në NATO.​ /Telegrafi/