Konjufca i ashpër me BE-në, Hasanpapaj: BE jo vetëm që i propozon drafte Kosovës, por të detyron t’i pranosh

Kryetari i Kuvendit të Kosovës, Glauk Konjufca, ka thënë sot se Kosova ka të drejtë të propozojë vetë draftin e Asociacionit dhe se nuk mundet që Bashkimi Evropian të ndërhyjë në këtë proces duke ia marrë këto kompetenca.

Juristi Bardhyl Hasanpapaj, i ftuar në RTV Dukagjini, ka folur rreth draftit të Asociacionit, duke thënë se Bashkimi Evropian do e detyrojë Kosovën që të pranojë draftet që propozojnë.

“Janë bërë drafte mbi drafte, megjithatë nuk mund ta nënvlerësojmë faktin që BE-ja jo vetëm propozon drafte, por avash avash të detyron edhe t’i pranosh ato”, tha Hasanpapaj.

Teksa thotë se me draftin e propozuar nga Bashkimi Evropian, është pajtuar vetë kryeministri, Albin Kurti.

“Me draftin Asociacionit që ka propozu BE-ja njëherë është pajtu Kurti e ka shpreh gatishmërinë që të nënshkruhet në prani të liderëve në Bruksel, ka qenë kërkesa që të nënshkruhen tri dokumentet Marrëveshja Brukeselit, Aneksi Ohrit dhe drafti asociacionit”.

Ai shtoi se kryeministri e kishte prezantuar në kuvend draftin e Asociacionit si më të mirë krahasuar me draftet paraprake.