Konfiskohen pije alkoolike dhe produkte ushqimore në Zubin Potok, katër vetura hyjnë ilegalisht nga Serbia në Kosovë

Njësitet policore kanë ndaluar katër vetura (tri targa serbe dhe një me targa lokale) të cilat hynin ilegalisht nga territori i Serbisë në Republikën e Kosovës.

Sipas raportit 24 orësh të Policisë bëhet e ditur se ngjarja ka ndodhur të enjten rreth orës 07:05 në fshatin Bubë, në Zubin Potok.

Tutje thuhet se gjatë kontrollit dhe verifikimit të tyre në të gjitha këto vetura kishte të ngarkuar mall të kontrabanduar, kryesisht pije alkoolike dhe produkte të ndryshme ushqimore.

“Raportohet se nga njësitë policore janë ndaluar 4 vetura (tri me targa serbe dhe një me targa lokale)  të cilat hynin ilegalisht, nga territori i Serbisë në R. e Kosovës. Gjatë kontrollit dhe verifikimit të tyre, në të gjitha këto vetura kishte të ngarkuar mall të kontrabanduar, kryesisht pije alkoolike dhe produkte të ndryshme ushqimore. Pas kontrollimit të dokumentacionit dhe veturave, është vërejtur se asnjëri nuk kishte dokumentacion mbi prejardhjen e mallit”, thuhet në raport.

Ndërkaq, siç thuhet në raport në lidhje me rastin veturat dhe mallrat janë konfiskuar dhe dorëzuar në terminal doganor, ndërsa me urdhër të prokurorit kujdestar, personat lirohen dhe rasti shkon në procedurë të rregullt. /Telegrafi/