Konfiskohen 350 kilogramë marihuanë në kalimin kufitar “Tabanoc” (Foto)

Zyrtarët doganorë në kalimin kufitar “Tabanoc”, kanë penguar kontrabandimin e një sasie të madhe të marihuanës.

Më 29 mars 2019, zyrtarët doganor gjatë kontrollit të një makine ngarkuese me targa të Shqipërisë e drejtuar nga F.B (62) nga Shqipëria, kanë gjetur rreth 350 kilogram marihuanë, përcjell Telegrafi Maqedoni.

“Në orët e para të mëngjesit, gjegjësisht rreth 01:30 në kalimin kufitar në dalje të shtetit është paraqitur për kontroll makina e tipit “Volvo” me targa të Shqipërisë, e drejtuar po ashtu nga shtetas të Shqipërisë, e cila nga zyrtarët doganorë është zgjedhur për kontroll të detajuar. Gjatë kontrolleve, në 130 paleta special për transport të luleve, janë gjetur rreth 350 kilogramë marihuanë”, thuhet në njoftimin e policisë.

Pas marrjes së rastit nga ana e inspektorëve të Departamentit për Hetime, Drejtoria Doganore kundër F.B (62) do të ngrit padi penale për veprën “prodhim të paligjshëm dhe lëshim në treg të substancave narkotike, psikotrope dhe prekusorëve”./Telegrafi/