Komunat e Maqedonisë nuk arrijnë t’i thithin fondet IPA për shkak të paaftësisë së tyre

Komunat kanë kapacitete dhe resurse njerëzore të dobëta për të aplikuar me projekte para fondeve evropiane. Prandaj, një pjesë e madhe e parave të BE-së që janë në dispozicion nuk shfrytëzohen sa duhet dhe dështojnë. Zoran Ilievski, trajner për projekte evropiane thekson se shfrytëzimi i fondeve evropiane nga institucionet maqedonase për momentin është më i vogël se 30%, përcjell Telegrafi Maqedoni.

”Ajo që është e qartë këtu është mungesa e kapacitetit të tillë, resurset e tilla në mënyrë të konsiderueshme e rrisin rrezikun e implementimit. Ka raste të komunave ku kanë filluar projekte dhe që janë ndalur për shkak të mungesës së kapacitetit për shkak të zbatimit të duhur, ndërsa ka komuna që i kanë ndërprerë edhe projektet e tyre” deklaroi për Alsat-M trajneri për projekte evropiane Zoran Ilievski.

”Varet nga madhësia e komunës dhe nga numri i të punësuarve. Jo të gjitha komunat në Maqedoni posedojnë resurse njerëzore dhe resurse financiare që të mund të lejojnë që t’i mësojnë apo të kenë njerëz përkatës të cilët do të punojnë vetëm në temën “fonde evropiane” deklaroi Katica Janeva, Asociacioni Evropian për Demokraci Lokale.

Përdorimi i fondeve të BE-së ka kritere të qarta që duhet të zbatohen.

”Në periudhën 2014-2020, Maqedonia ka 6-7 milion në shfrytëzim. E rëndësishme është të dihet nëse komunat kanë kapacitet për zbatimin e këtyre projekteve dhe gjithashtu kapacitete për të menaxhuar me buxhet dhe financa”, deklaroi ambasadori francez në Maqedoni Christian Thimonier.

Hetimi i Shoqatës Evropiane për Demokraci Lokale që u prezantua në Strugë, tregon se problemi më i madh me të cilin përballen komunat gjatë aplikimit është mungesa e bashkëfinancimit nga fondet e veta dhe financime të mjaftueshme për implementim edhe atë 61.3%. Edhe pse Banka e Maqedonisë për Përkrahje dhe Zhvillim ka siguruar linjë kredie për këtë qëllim, vetëm 16.1% e komunave të anketuara deri më tani kanë shfrytëzuar këtë linjë kreditore./Alsat-M/Telegrafi/