KMDLNj kërkon hetime për vdekjen e të paraburgosurit në Pejë

Këshilli për Mbrojtjen e të Drejtave dhe Lirive Njerëzore (KMDLNJ) ka reaguar pas rastit tragjik në Qendrën e Paraburgimit në Pejë, ku është gjetur pa shenja jete i paraburgosuri B. Gj.

Në njoftimin për media thuhet se sipas informatave të KMDLNj –së, më datë 28 gusht 2019 në ora 7.15 në Qendrën e Paraburgimit në Pejë është gjetur pa shenja jete i paraburgosuri B.Gj. i lindur me 26.02.1967 në Klinë, i cili në këtë qendër ka ardhur më 14.06. 2019 me ç’rast i është hapur dosja mjekësore.

Lexo po ashtu Vetvritet një i paraburgosur në Qendrën e Paraburgimit në Pejë

“Pas ardhjes në QP në Pejë, ai nuk ka kërkuar asnjëherë ndihmën e mjekut sikur që nuk ka përdorur asnjë lloj terapie. Në momentin e pranimit i maten të gjithë parametrat vitalë, të cilat dalin të jenë brenda normave. Gjatë anamnezës i paraburgosuri, tash i ndjeri B.Gj. nuk jep të dhëna të ketë qenë i hospitalizuar më herët apo se është operuar. KMDLNJ kërkon hetime lidhur rastin për të zbuluar nëse ka arsye tjera rrethanore që kanë ndikuar në vetëvrasjen e të paraburgosurit. Sipas raporteve të KMDLNj-së, i paraburgosuri nuk ka treguar asnjë indikacion se ka prirje për vetëvrasje andaj në rastin konkret nuk janë zbatuar masat e kontrollit, kujdesit dhe mbikëqyrjes së shtuar siç veprohet në rastet e tilla”, thuhet në njoftim.

Ndër të tjera sipas KMDLNj  thekson se pasi i paraburgosuri B.Gj. ka qenë në pritje të ekstradimit në SHBA, i dyshuar për një vrasje në Miçigen, ndoshta ky ekstradim mund edhe të jetë arsye që i paraburgosuri të vetëvritet dhe për këtë arsye kërkon hetim të shpejtë dhe caktim të përgjegjësisë eventuale nëse për këtë sigurohen prova./Telegrafi/