Klinë, vazhdon ndalimi i qarkullimit nga ora 17:00 deri në ora 06:00

Kryetari i Komunës së Klinës, Zenun Elezaj, dje ka pranuar vendimin e Ministrisë së Shëndetësisë lidhur me orarin e ndalimit të qarkullimit të qytetarëve dhe automjeteve private.

Ky vendim për Komunën e Klinës, vazhdon orarin e njëjtë të ndalim qarkullimit të qytetarëve dhe automjeteve private nga ora 17:00 pasdite deri në ora 06:00 të mëngjesit, transmeton Telegrafi.

Në njoftimin e bërë nga Komuna e Klinës thuhet se, kryetari Elezaj shpreh shqetësimin e tij në lidhje me rritjen e numrit të të diagnostifikuarve me virus dhe apelon të  qytetarët që të respektojnë këtë vendim për ndalim qarkullimi, ndërsa kohën e lejimit të lëvizjes të mos lëvizin pa nevojë.

Komuna e Klinës deri më tani ka katër raste të konfirmuara me virusin COVID-19.

“Pacientja zero, shtetasja italiane, e cila është konfirmuar si e shëruar dhe është kthyer ne Itali. Një rast nga karantina në Qendrën e Studentëve, i cili nuk ka pasur kontakt me persona të tjerë të komunës së Klinës. Dhe dy infermiere, njëra pjesë e stafit të Klinikës Infektive në QKUK, ndërsa rasti i fundit, qytetare e komunës së Klinës nga fshati Çabiq, infermiere në Spitalin Amerikan”, thuhet në njoftim.

Kryetari Elezaj sqaron se, menjëherë pas konfirmimit të rastit, komuna ka kontaktuar me familjen e të infektuarës, të cilët janë udhëzuar në vetizolim, ndërsa do të ju bëhen edhe testet. Po ashtu, ka filluar hulumtimi i kontakteve të mundshme. /Telegrafi/