Kjo gjendje e zakonshme në shtatzëni rrit rrezikun e problemeve të zemrës më vonë

Një studim zbuloi se gratë shtatzëna me preeklampsi kishin katër herë më shumë gjasa për këtë rrezik

Gratë që kanë presion të lartë të gjakut gjatë shtatzënisë do të kenë më shumë gjasa të vuajnë nga problemet e zemrës në vitet pas lindjes, thonë ekspertët.

Gjetjet vijnë pas një studimi që përfshinte gati gjysmë milioni gra, duke studiuar ndikimin e presionit të lartë të gjakut – i njohur si hipertensioni – në shëndetin e zemrës.

Ekspertët kanë arritur në përfundimin se gratë shtatzëna me tension të lartë janë më të ekspozuara ndaj rrezikut të sëmundjeve të zemrës pas lindjes.

Shkencëtarët nga Britania e Madhe zbuluan se gratë me ndonjë nga tri llojet e hipertensionit kanë 15 për qind më shumë gjasa të kenë sëmundje të arterieve koronare.

Ato gjithashtu kanë 11 për qind më shumë gjasa të kenë një goditje në tru, transmeton Telegrafi.

Megjithatë, gratë me këtë gjendje nuk janë në rrezik më të madh për probleme të tjera të zemrës, si dështimi i zemrës ose fibrilacioni atrial – çka shkakton rrahjen e parregullt të zemrës.

Hipertensioni prek rreth 10 për qind të nënave në pritje dhe mund të ndodhë në nivele të ndryshme të ashpërsisë.

Studime të tjera kanë zbuluar se kjo gjendje mund të shkaktojë disa sëmundje fatale tek fëmijët më vonë në jetë, shkruan “The Sun”.

Cilat janë simptomat e hipertensionit te gratë shtatzëna?

Sipas Spitalit të Fëmijëve të Filadelfisë, simptomat përfshijnë:

▪ Rritje e presionit të gjakut
▪ Mungesa ose prania e proteinave në urinë (për diagnostikimin e hipertensionit gestacional ose preeklampsisë)
▪ Edemë (ënjtje)
▪ Shtim i papritur në peshë
▪ Ndryshimet vizuale si shikimi i paqartë ose i dyfishtë
▪ Të përziera, të vjella
▪ Dhimbje në anën e djathtë në pjesën e sipërme të stomakut ose dhimbje rreth stomakut

Lexo po ashtu Hipertensioni në shtatzëni, EPH gestozat

Megjithatë, shumë njerëz nuk i vërejnë shenjat e hipertensionit, që do të thotë se zakonisht zbulohet gjatë ekzaminimeve rutinë prenatale.

Ekzistojnë tre lloje të ndryshme të presionit të lartë të gjakut të lidhur me shtatzëninë – të gjitha ndodhin në faza të ndryshme të shtatzënisë.

Ato quhen hipertension kronik, hipertension gestacional dhe preeklampsi.

Studimi, i publikuar në “International Journal of Gynecology and Obstetrics“, mbështet kërkimet e mëparshme mbi efektet e rrezikshme të presionit të lartë të gjakut tek gratë shtatzëna.

Një studim zbuloi se gratë shtatzëna me preeklampsi kishin katër herë më shumë gjasa për të pasur një atak në zemër dhe tre herë më shumë të ngjarë të kishin një goditje në tru brenda 10 viteve nga lindja. /Telegrafi/