Kërkimi për ‘nëndetësen’ e zhdukur e ka kaluar ‘afatin’ prej 96 orësh të furnizimit me oksigjen

Kërkimi për “nëndetësen me turistë” të zhdukur në një ekspeditë për të parë rrënojat e Titanikut kaloi pikën kritike prej 96 orësh të enjten kur “ajri i frymëmarrjes” mund të kishte mbaruar, një moment i zymtë në përpjekjet intensive për të shpëtuar pesë personat në bord.

Sipas mediave të huaja, përcjell Telegrafi, Titan u vlerësua të kishte rreth katër ditë furnizim me ajër kur u nis të dielën në mëngjes në Atlantikun e Veriut.

Por ekspertët kanë theksuar se ky ishte një vlerësim jo patjetër i saktë në fillim dhe mund të zgjatej nëse pasagjerët do të kishin marrë masa për të ruajtur oksigjenin.

Dhe nuk dihet nëse ata mbijetuan që nga zhdukja e saj.

Lexo po ashtu Kërkimi i “nëndetëses turistike” të zhdukur në Oqeanin Atlantik – cilat janë sfidat kryesore dhe skenarët e mundshëm?

Ndryshe, ekipet e shpëtimit kanë dërguar anije, aeroplanë dhe pajisje të tjera në vendin e zhdukjes.

Të enjten, roja bregdetare e SHBA tha se një robot nënujor i dërguar nga një anije kanadeze kishte arritur në fundin e detit, ndërsa një institut kërkimor francez tha se një robot zhytës thellë me kamera, drita dhe “krahë” gjithashtu iu bashkua operacionit.

Autoritetet shpresojnë se tingujt nënujorë mund të ndihmojnë në ngushtimin e zonës së kërkimit, zonë që është zgjeruar sa dyfishi i madhësisë së Connecticut dhe në ujërat 4 kilometra të thella.

Titan u raportua e zhdukur pasditen e së dielës rreth 435 milje (700 kilometra) në jug të St. John’s, Newfoundland, teksa ishte në rrugën e tij drejt vendit ku anija ikonë e oqeanit u fundos më shumë se një shekull më parë. /Telegrafi/