Kërkesa të mëdha për e-tron, mijëra parapagesa për makinën e parë elektrike nga Audi (Foto)

Pritet që të arrijë në kohën e paraparë

Audi ka marrë shumë vëmendje në LA Auto Show, ku e prezantoi konceptin e e-tron GT nga aktori i Iron Man, Robert Downey JR, transmeton Telegrafi.

Derisa kjo makinë është ende në fazën e konceptit dhe nuk do të hyjë në prodhim për një kohë të konsiderueshme, interesimi shkon te e-tron SUV, që është e para makinë elektrike nga Audi.

Menaxheri i produkteve në Audi, Matt Moustafei ka bërë të ditur se ka kërkesa shumë të mëdha për këtë makinë, madje janë bërë edhe mijëra parapagesa.

Për këtë e-tron, kompania kërkon 1,000 dollarë parapagim, që do të zbatohet më pas në çmimin e përgjithshëm. Deri më tani, janë më se dhjetëmijë parapagues, ndërsa kërkesa ende po vazhdon.

“Kemi shumë kërkesa dhe jemi duke punuar me përkushtim, që ta sjellim me kohë siç kemi premtuar, në gjysmën e dytë të vitit që vjen”, ka thënë Moustafei.

Çmimi për modelin bazë Premium Plus është 74,800 dollarë, ndërsa për versionin Prestige duhet të paguhen 81,800 dollarë. /Telegrafi/