Protesta në veri – bëhet thirrje për formimin e Asociacionit, zyrtarët serbë nuk harrojnë të thurin lavde për Milan Radoiçiqin

E plotësuar: Në veri të Mitrovicës është mbajtur protesta e serbëve kundër vendimit të Qeverisë për targat. Të pranishmëve në këtë protestë iu drejtua kryetari i Listës Serbe, Goran Rakiq dhe nënkryetari i saj, Igor Simiq.

Kreu i Listës Serbe, Goran Rakiq ka bërë thirrje që të themelohet Asociacioni i komunave me shumicë serbe.

Ai ka shtuar se “në ditën kur kemi vendosur që të largohemi nga institucionet e Kosovës, e kemi bërë të qartë se zgjidhja e problemeve është nëpërmjet dialogut për një jetë më të mirë për serbët, shqiptarët, boshnjakët, goranët, romët dhe të tjerët”

“Dje kemi dhënë dorëheqje, sot po ua kthejmë mandatin, pasi ju na keni zgjedhur e jo Prishtina”, ka thënë Rakiq.

Ai ka shtuar se nuk ka kthim mbrapa.

“Albin Kurti e Vjosa Osmani dhe drejtuesit e tjerë me dhjetëra herë kanë thënë se për ta nuk ekzistojnë marrëveshjet e Brukselit dhe se nuk do të ketë Asociacion të Komunave serbe. Ne do ta vazhdojmë luftën tonë në atë që është e shkruar në marrëveshjet e Brukselit, siç është formimi i Asociacionit të Komunave serbe, duk i plotësuar të gjitha kushtet ashtu siç është nënshkruar në Bruksel. E përshëndetim kryetarin Aleksandar Vuciq dhe shtetin tonë – Serbinë. Ne nuk do të tërhiqemi dhe nga këtu nuk ka kthim mbrapa”, tha Rakiq.

Nënkryetari, Igor Simiq ka thënë se po luftojnë për paqe dhe stabilitet për të gjithë qytetarët pa dallim.

“Luftojmë për paqe, për stabilitet. Edhe për serbët edhe për shqiptarët edhe për boshnjakët edhe goranët e të gjithë të tjerët”, ka thënë ai para qytetarëve serbë të Kosovës”, tha Simiq.

Ai përmendi edhe deklaratën e kryeministrit Albin Kurti i cili tha se nuk ka komuna serbe në Kosovë, por ka komuna me shumicë serbe.

“Para disa ditësh, Kurti tha se s’ka komuna serbe në Kosovë, tash s’ka institucione të Prishtinës në veri të Kosovës. Në fund dua të theksoj se barra e kësaj beteje për popullin serb i takon personit që ndoshta ka barrën më të madhe për disa vite, vetëm se do dhe e mbron popullin serb dhe gjithashtu e do shtetin e vet – Serbinë, dhe për këtë ju ftoj për një duartrokitje përkrahëse për patriotin më të madh, i cili nuk iu nënshtrua presioneve, vëllain tonë Milan Radoiciqin”, tha Simiq.

Në protestë foli edhe qjyqtarja Liliana Stevanoviq. Ajo ka thënë se gjyqtarët dhe prokurorët serbë janë larguar nga gjyqësori i Kosovës.

“Ne kemi vendosur unanimisht të largohemi nga sistemi gjyqësor dhe t’i bashkohemi të gjithëve në këtë luftë. Vendimi ynë është i qartë. Mendoj se jemi ambasadorët më të mirë të gjyqësisë serbe”, ka thënë Stevanoviq.

E ish-drejtori i Policisë së Kosovës për veri, Nenad Gjuriq, që u suspendua pasi refuzoi të zbatonte vendimin e Qeverisë së Kosovës për targat, ka thënë se nuk kanë tokë tjetër dhe se do “në tokën e tij të mbjellë lule që do të përhapin erën e paqes”.

Ish-kryetari i Mitrovicës së Veriut, Milan Radojeviq, ka falënderuar gjithë të tubuarit dhe ka thënë se po dërgohet mesazh “paqeje”. /Telegrafi/

Me këngë nacionaliste dhe parulla, qytetarët serb grumbullohen në veri të Mitrovicës

Në sheshin “Car Lazar” në veri të Mitrovicës ka nisur protesta e serbëve e ftuar nga Lista Serbe.

Numër i madh i qytetarëve serb janë parë në këtë shesh, ndërkaq gjithandej shihen flamujt e Serbisë si dhe dëgjohet muzikë nacionaliste.

Në duar kanë parulla: “Jam serb, dhe kjo është e gjitha e imja”, “Sot Nenad Gjuriq, e nesër çdo serb në Kosovë…!” dhe “Për fëmijët tanë nuk ka dorëzim”. /Telegrafi/