Kapet përdhunuesi në Kaliforni, 16 vite i kaloi në arrati me një grua që nuk e dinte se kush ishte

Një i arratisur i quajtur “përdhunuesi me erë të keqe të gojës” është arrestuar në zonën e Gjirit të San Francisos, më shumë se 16 vjet pasi ai u arratis pas dënimit të tij për sulm seksual ndaj një kolege në Massachusetts.

Tuen Kit Lee u shpall fajtor në një gjyq të vitit 2007 për rrëmbimin dhe përdhunimin e gruas së re në shtëpinë e saj në Quincy, në jug të Bostonit, tha në një deklaratë të martën Shërbimi i Marshallëve të SHBA. Ai ishte arratisur para se të dënohej, transmeton Telegrafi

Zyrtarët e mbajtën të hapur rastin, dhe fotografia e Lee u shfaq disa herë në televizionin “America’s Most Wanted”.

Pasi u shfaqën imazhet në mediat sociale të një njeriu që besohet se ishte Lee, hetuesit ishin në gjendje ta gjurmonin atë në kontenë Contra Costa të Kalifornisë.

Marshalët dhe policët amerikanë arrestuan Lee të martën, pasi e panë atë dhe një grua të largoheshin nga një “rezidencë shumë milionëshe” pranë Danville, në lindje të Oakland, thanë zyrtarët.

Pasi vetura e tij u ndalë, Lee fillimisht dha një emër të rremë, por rrëfeu kur u shtyp për identitetin e tij të vërtetë, thanë autoritetet. Ai u identifikua më vonë përmes gjurmëve të gishtërinjve.

“Shoqëruesja e tij femër, pas 15 vitesh që ishin së bashku në Kaliforni, nuk e dinte kurrë se kush ishte ai në të vërtetë”, u tha në një deklaratë policia në Massachusetts. /Telegrafi/