Kamberi: Vuçiq po përdor kërcënimet për të ruajtur pushtetin, por dështimi i tij është afër

Deputeti shqiptar në Parlamentin e Serbisë, Shaip Kamberi ka komentuar situatën aktuale në Serbi dhe ndikimin e regjimit të Aleksandar Vuçiqit në shoqërinë serbe dhe në Luginën e Preshevës.

Ai theksoi se Vuçiq po përballet me një krizë të thellë politike, ndërsa qytetarët serbë, sidomos studentët dhe protestuesit, po shprehin pakënaqësinë ndaj udhëheqjes së tij autoritare.

Sipas Kamberit, protestat kundër Vuçiqit janë një reagim ndaj arrogancës dhe papërgjegjshmërisë së tij dhe pushtetit të SNS, që ka degraduar çdo institucion dhe ka lidhur marrëdhënie me krimin e organizuar.

“Kërcënimet e Vuçiqit janë sjellje tipike të një autokrati, fuqia e të cilit po perëndon,” shkruan Kamberi, duke nënvizuar se protesta ka shpërthyer për shkak të ngjarjeve si tragjedia e Novi Sadit, ku 15 persona humbën jetën për shkak të shembjes së stacionit hekurudhor.

Vuçiq dhe zyrtarët e tij kanë mohuar përgjegjësinë, duke shfajësuar të kaluarën dhe duke fajësuar ata që e ndërtuan objektin 60 vjet më parë.

Kamberi i referohet deklaratave të Vuçiqit, ku ai ka sulmuar kundërshtarët politikë dhe ka përfshirë edhe fqinjtë, duke shpërfaqur një retorikë kërcënuese dhe përpjekje për të bashkuar serbët rreth tij.

Sipas Kamberit, përpjekjet e Vuçiqit për të mbrojtur pushtetin dhe për të demonizuar opozitën janë një shenjë e dobësimit të tij dhe i frikës nga drejtësia.

Në lidhje me Bujanocin, Kamberi theksoi se, ndërkohë që ka pretendime për një oazë multietnike, shumë shqiptarë janë përjashtuar nga institucionet e shtetit serb, duke u diskriminuar në sektorë të rëndësishëm si gjyqësori, policia dhe shëndetësia.

Ai ngriti shqetësimin për ndarjen e fondeve dhe mungesën e investimeve në këtë rajon, duke theksuar se “shpresat e optimistëve për zhvillim janë shuar me rebalancin e Buxhetit të vitit 2024 dhe shpërndarjen e fondeve për komunat shqiptare.”

Kamberi përfundoi duke u pyetur se sa gjatë do të qëndrojë Bujanoci besnik ndaj regjimit të Vuçiqit dhe a do të vazhdojë të mbështesë politikën e tij, e cila ka sjellë varfëri dhe diskriminim për shqiptarët e Luginës së Preshevës. /Telegrafi/