Një burrë nga Gjeorgjia është akuzuar për vrasjen e një çifti në vitin 1985 në një kishë, pasi i dyshuari fillestar u shfajësua falë provave të ADN-së.
Erik Kristensen Sparre po përballet me akuza për vrasje dhe sulm të rëndë për vrasjen e Harold dhe Thelma Swain.
61-vjeçari u arrestua gati katër dekada më parë, pasi çifti u qëllua për vdekje brenda kishës baptiste Rising Daughter në qarkun Camden.
Sparre u bë fokus i një hetimi të “freskët”, pasi autoritetet arritën në përfundim se fillimisht kishin ndjekur penalisht njeriun e gabuar.
Dennis Perry u dënua me burgim të përjetshëm, kur një juri e dënoi atë në vitin 2003 për vrasjen e Swains, transmeton Telegrafi.
Ai kaloi dy dekada në burg përpara se një gjyqtar i Gjykatës së Lartë, të urdhëronte një rigjykim në vitin 2020.
Gjykatësi hodhi poshtë të gjitha akuzat kundër Perry në vitin 2021, pasi prokurorët kërkuan të pushonin çështjen.
Hetuesit dhe gjykatat hodhën një vështrim të ri në çështjen pasi avokatët e Projektit të Pafajësisë së Gjeorgjisë, testuan ADN-në nga qimet e gjetura në menteshën e një palë syze të mbetura pranë trupave të viktimave.
Ata thanë se ADN-ja përputhej me Sparre, i cili dikur ishte konsideruar i dyshuar, dhe jo Perry. /Telegrafi/
