Ka disa vite që është duke u ftuar, por ai ende nuk ka marrë vendimin përfundimtar deri më tani.

Megjithatë duket se më në fund është bindur dhe Elvis Rexhbecaj do të jetë futbollisti më i ri i Dardanëve.

Në prezantimin e përzgjedhësit të ri Franc Foda, gjermani u pyet për mesfushorin kosovar që luan te Augsburgu në elitën e futbollit gjerman.

Lexo po ashtu "Do të jetoj në Prishtinë, njoh disa futbollistë të Kosovës" - fjalët e para të Franco Fodas si trajner i Dardanëve

“Po e njoh Elvis Rexhbecajn dhe e kam parë duke luajtur te Augsburgu. Do të shkoj ta vizitojë dhe ta ftoj që të na bashkohet”, deklaroi shkurtimisht Foda.

Në atë moment ndërhyu edhe i pari i Federatës së Futbollit të Kosovës, Agim Ademi i cili dha një lajm të madh sa i përket Rexhbeçajt.

“Ka vite që e kemi ftuar dhe tani jemi në fazën finale ku lojtari do të pajiset me pasaportë dhe do të na bashkohet në ndeshjet e ardhshme”, ka deklaruar Agim Ademi.

Padyshim që ky është një lajm i madh duke parë nevojën e Kosovës për një mesfushor kualitativ.

26-vjeçari është titullar i padiskutueshëm te Augsburgu, derisa këtë edicion në 21 ndeshje zyrtare ka realizuar edhe dy gola. /Telegrafi/