Juventusi i ka dërguar ofertë për vazhdimin e kontratës Rabiotit, klubi ka edhe një dhuratë për francezin

Mediume të shumta në Itali pretendojnë se drejtori sportiv i Juventusit, Cristiano Giuntoli ka bërë një ofertë për të zgjatur kontratën e Adrien Rabiot.

Marrëveshja e francezit me Zonjën e Vjetër skadon muajin e ardhshëm, kështu që Giuntoli ka bërë një lëvizje për të zgjatur qëndrimin e mesfushorit në klub.

La Gazzetta dello Sport dhe Sky Sport Italia raportojnë se drejtori i Bianconerëve ka dërguar ofertën e tij, por Rabiot ende nuk është përgjigjur përmes nënës së tij dhe agjentes Veronique Rabiot.

Gazzetta raporton se propozimi i Juventusit është një marrëveshje dyvjeçare me një opsion për një edicion tjetër. Paga do të mbetet e njëjtë, rreth 9 milionë euro në sezon, duke përfshirë bonuset.

Sipas raportit, Juventusi i ka ofruar edhe Rabiot që të bëhet kapiten i skuadrës pas largimit të brazilianit Danilo.

Dy palët nuk besohet se kanë arritur ende një marrëveshje, pasi nëna e Rabiot dëshiron që mesfushori francez të bëhet lojtari me pagën më të lartë në ekip, më shumë se Dusan Vlahovic.

Lexo po ashtu E ardhmja e Rabiot në Ligën Premier, dy top klube pas tij

Paga e sulmuesit serb do të rritet automatikisht në 12 milionë euro sezonin e ardhshëm, por Juventusi është në bisedime për të shpërndarë pagat e tij në një marrëveshje më të gjatë dhe shpreson të arrijë një marrëveshje me Rabiot dhe Vlahovic në javët e ardhshme. /Telegrafi/