Banorët e një ndërtese luksoze në Manhattan kanë qenë dëshmitarë të një operacioni të pazakontë logjistik. Jeff Bezos, një nga njerëzit më të pasur në botë, ka përdorur një prej vinçave më të mëdhenj në Nju Jork për të dërguar mobiliet drejtpërdrejt në penthouse-in e tij.
Për këtë arsye, rruga përpara ndërtesës është mbyllur plotësisht, ndërsa një ekip i tërë profesionistësh ka koordinuar çdo lëvizje me përpikëri.
"Donit të shihnit si i sjell Jeff Bezos mobiliet? Shikoni atë vinç! Ato janë katet e sipërme të tij, dhe sot po i vijnë mobiliet e reja. E gjithë rruga është e bllokuar, dhe një ekip njerëzish po menaxhon çdo detaj", ka treguar një prej fqinjëve, i cili e ka filmuar të gjithë skenën.
Ndryshe nga zhvendosjet e zakonshme që zakonisht realizohen me një furgon dhe ndihmën e disa miqve, versioni i Bezos përfshin dhjetëra punëtorë, disa vinça dhe madje edhe shoqërim policor. “Kur unë lëviz mobiliet, përdor një vinç të vogël – Bezos ka një ‘përbindësh’ të vërtetë dhe një ekip të tërë që merret me çdo detaj”, ka shtuar me ironi një tjetër banor.
Ndërkohë, kujtojmë se jahti Koru, në pronësi të Jeff Bezos, është parë së fundmi në marinën e Kaštelës në Kroaci. Pranë tij është ankoruar edhe Abeona, anija ndihmëse e miliarderit amerikan.
Përflitet se Jeff Bezos dhe e fejuara e tij, Lauren Sanchez, ndodhen gjithashtu në jaht. Të dy janë në prag të martesës, e cila është paralajmëruar të mbahet më 24 qershor në ishullin San Giorgio Maggiore në Venecia – një dasmë që shumë po e quajnë tashmë “dasma e shekullit”, për shkak të luksit dhe kostos së saj marramendëse. /Telegrafi/
