Jahja Koka: Përmes Kuvendit do të japë kontributin tim në sferën e arsimit

Kandidati i Vetëvendosjes për deputet, Jahja Koka, premton se do të kontribuojë në sferën e arsimit nëse futet në parlament.

Koka, në “Dossier D” në RTV Dukagjini thotë se interesi i tij për politikën ka qenë qysh nga fëmijëria pasi edhe prindërit e tij ishin të angazhuar në politikë.

Ai thotë se edhe në kohën kur ka qëndruar si profesor në universitet për dekada të tëra asnjëherë nuk është emëruar shef i katedrës për arsye siç thotë “Ishte i papërshtatshëm pasi ishte djali i Osman Kokës- një antikomunistë që ka vajtuar në burgun e Goli Otokut”.

Koka thotë se ishte edhe pjesë e UÇK-së, duke iu përgjigjur kushtrimit që kishte dhënë Jakup Krasniqi në atë kohë.

Ai thotë se vendosi tash të kyçet në politikë për shkak të gjendjes së rëndë ekonomike dhe arsimore që ka kapluar Kosovën.

Fizikani thotë se kontributin kryesor do ta japë në sferën e arsimit që sipas tij është në gjendje shumë të rëndë.

“Në radhë të parë tekstet shkollore që janë me shumë gabime shkencore e që mësohen nga nxënësit”.

Ai shton më tej se tekstet që mësohen nga nxënësit në Kosovë janë të përkthyera nga gjuha serbo-kroate e që sipas tij janë të vjetruara.

Koka thotë se nuk do të jetë kundër askujt, por sipas tij e vërteta duhet t’u thuhet të gjithëve që në Kosovë nuk ka arsim shkencor.

Ai ka se Kosova ka talente të shumta dhe sipas tij koeficienti inteligjencës te shqiptarët është ndër më të lartit.

Kandidati i Lëvizjes Vetëvendosje thotë se ka një përgatitje politike shumë moderne dhe se ka të botuar artikuj shkencorë edhe në gazeta prestigjioze si Neë York Times, Herald Tribune etj./Telegrafi/