iPad – probleme me sinjalin Wi-Fi?

Forumet e Apple për përkrahjen e shfrytëzuesve këtyre ditëve janë të stërmbushur me ankesat në iPadin e ri. Në ankesat që pretendonin tejnxehjen e pajisjes nga kompania u përgjigjen se çdo gjë është në rregull, respektivisht “brenda specifikave termike”.

Por, gjërat nuk përfunduan me kaq. Siç shkruan AppleInsider, pronarët e tabletit të ri ankohen në problemet me sinjalin Wi-Fi. Në krahasim me iPadin e gjeneratës së parë dhe të dytë, iPadi i ri sipas pohimeve nuk e zë sinjalin aq mirë, e në disa raste madje as që e gjen rrjetin Wi-Fi. Gjithashtu, një numër i caktuar i shfrytëzuesve tha se me iPhone dhe MacBook Pro nuk kanë problem me sinjalin Wi-Fi, derisa në iPadin e ri sinjali është dukshëm më i dobët (sinjali i plotë në indikator, në krahasim me një vijë në iPad). Testet në faqen Speedtest.net tek një numër i shfrytëzuesve treguan brez dyfish më të dobët në krahasim me pajisjet tjera të Apple.

Probleme të ngjashme kishte edhe iPadi origjinal. Shfrytëzuesit ankoheshin në pranimin e dobët të sinjalit Wi-Fi, dhe në pamundësinë e kyçjes në rrjetë. Apple asokohe pati pranuar ekzistencën e këtyre problemeve, dhe pati publikuar një përditësim softuerik me të cilin ata ishin korrigjuar. /Telegrafi/