Influencuesja kontroverse e Ashley St Clair pretendon se ka lindur fëmijën e 13-të të Elon Musk dhe e ka rritur e vetme prej pesë muajsh

Elon Musk është bërë baba për herë të 13-të me influenceren konservatore 26-vjeçare Ashley St Clair, e cila e bëri lajmin publik të premten në mbrëmje në rrjetin e tij social, X.

St Clair, e njohur për qëndrimet e saj të forta konservatore dhe për lidhjet me grupet e ekstremit të djathtë, e ndau lajmin në një postim të bërë në Ditën e të Dashuruarve.

“Pesë muaj më parë solla në jetë një fëmijë të ri. Elon Musk është babai”, shkroi ajo, shkruan DailyMail.

Ajo shpjegoi se më parë nuk e kishte bërë publike këtë lajm për të mbrojtur privatësinë dhe sigurinë e fëmijës, por theksoi se së fundmi kishte kuptuar se mediat rozë po përpiqeshin ta ekspozonin gjithsesi.

“Unë synoj që fëmija im të rritet në një mjedis të qetë dhe të sigurt. Për këtë arsye, i kërkoj medias të respektojë privatësinë e tij dhe të shmangë raportimet e tepruara”.

Menjëherë pas këtij njoftimi, Musk reagoi me një emoji duke qeshur me lot ndaj një fansi që e quajti lindjen e fëmijës një tjetër “mision anësor” të miliarderit.

Sipas DailyMail, St Clair është zhvendosur rreth një vit më parë në një apartament luksoz pranë City Hall në Manhattan, me një qira të vlerësuar midis 12,000 dollarëve dhe 15,000 dollarëve (11,430-14,290 eurove) në muaj.

Një nga banorët e godinës ekskluzive, ku kanë jetuar VIP-a dhe të famshëm, tha se St Clair ishte personi i parë në ndërtesë që bleu një ‘Tesla Cybertruck’, duke ngritur pikëpyetje se si ajo mund ta përballonte këtë nivel jetese.

Fqinjët gjithashtu konfirmuan se ajo dukej se jetonte si nënë beqare, por kishte një dado me kohë të plotë që kujdesej për dy fëmijët e saj: foshnjën e Musk dhe një fëmijë të mëparshëm nga një lidhje tjetër.

Musk ka të paktën 12 fëmijë të tjerë nga tri gra: Justine Wilson, Claire Elise Boucher (Grimes) dhe Shivon Zilis. Lidhjet e tij romantike kanë qenë gjithmonë në qendër të vëmendjes.

Spekulimet për një marrëdhënie mes miliarderit dhe influenceres nisën pasi ata shkëmbyen mesazhe publike në X (ish-Twitter), që nga maji i vitit 2023. Ata bënin batuta me referenca seksuale, duke përfshirë shaka për “foto intime”, “tërheqje jashtë kohe” dhe “si bëhen fëmijët”.

Në korrik, Musk i uroi ditëlindjen, ndërsa ajo i dërgoi emoji me zemra. Ai madje i sugjeroi një listë të gjatë librash dhe i tha se “ky është momenti më i mirë në histori për të pasur fëmijë!”.

St Clair, e lindur në Florida dhe e rritur në Kolorado, ka ndërtuar një ndjekës të madh në X, ku ka mbi një milion ndjekës. Ajo ka shkruar një libër për fëmijë kundër ideologjive progresive dhe ka qenë e lidhur me figura të ekstremit të djathtë në ShBA.

Miqtë e saj dyshuan se diçka e madhe po ndodhte në jetën e saj, pasi ajo u kërkoi të nënshkruanin marrëveshje konfidencialiteti (NDA), në një kohë kur filluan të përhapeshin thashethemet për lidhjen e saj me Musk.

Një nga banorët e rezidencës së saj në Manhattan tha për DailyMail se St Clair mbante një profil të ulët, ishte e kujdesshme për sigurinë dhe madje kishte instaluar kamera sigurie në derën e saj, pavarësisht masave të larta të sigurisë në ndërtesë.

Gjatë shtatzënisë, ajo u zhduk nga daljet publike për disa muaj dhe u shfaq shumë rrallë në kamera, duke u kujdesur që videot e saj të ishin të prera ngushtë, për të mos zbuluar barkun.

Megjithatë, pas lindjes së foshnjës, ajo u rikthye në qarqet politike konservatore, duke marrë pjesë në festën e zgjedhjeve të Donald Trumpit në Mar-a-Lago.

Ajo publikoi në X (ish-Twitter) fotografi me personalitete si Ginger Gaetz (gruaja e kongresmenit Matt Gaetz) dhe zëdhënësen republikane Elizabeth Pipko.

Stafi i rezidencës luksoze të St Clair konfirmoi se nuk kanë parë kurrë Elon Muskun në ndërtesë. “Nëse ai do të vinte, do të duhej të mbyllnim gjithë ndërtesën për sigurinë e tij”, tha një burim për DailyMail.

Një nga fqinjët, i cili jeton në një nga katet më të larta të ndërtesës, deklaroi se nuk kishte parë kurrë ndonjë burrë të hynte apo të dilte nga apartamenti i saj.

“Ajo nuk është shumë e shoqërueshme me fqinjët. Por është e qartë që atje ka një foshnjë dhe një fëmijë të vogël. Dadoja e saj punon me kohë të plotë”, tha burimi.

Në një intervistë për New York Post në korrik 2021, St Clair kishte deklaruar se ishte kundër politikave progresive për identitetin gjinor, duke thënë: “Më frikëson ideja që djali im të vijë një ditë në shtëpi duke qarë dhe të thotë: ‘Shokët e mi identifikohen ndryshe, dhe unë ndihem njësoj’, e pastaj të kërkojë terapi hormonale”.

Ndërkohë, George Santos, ish-kongresmeni i dënuar për mashtrim, doli publikisht në mbrojtje të saj në X (ish-Twitter).

“Do të dal nga hiatusi për këtë! Nëse dikush përpiqet ta shfrytëzojë ose ta ekspozojë atë dhe fëmijën e saj, do t’u tregoj se sa ide e keqe është kjo”, shkroi ai.

“Ti je një nënë e jashtëzakonshme, dhe unë e di këtë nga përvoja personale. Asgjë nuk do të ndryshojë dhe ti ke kontrollin e plotë. Të dua, mike!”.

Musk ka thënë vazhdimisht se dëshiron të ketë një familje të madhe dhe beson se “qytetërimi do të shembet nëse njerëzit nuk bëjnë më shumë fëmijë”.

Në një rast të fundit, ai u shfaq në një konferencë për shtyp me Donald Trump në Zyrën Ovale, duke marrë me vete djalin e tij X Æ A-12, i cili madje u pa duke i pëshpëritur diçka në vesh presidentit.

Musk gjithashtu ka sjellë fëmijët e tij në takime ndërkombëtare, përfshirë një vizitë me Kryeministrin Indian, Narendra Modi.

Pavarësisht kritikave, miliarderi vazhdon të jetë një prej figurave më të diskutueshme në botë, si për jetën e tij profesionale, ashtu edhe për atë private. /Telegrafi/