Infektimi i mundshëm me COVID-19 i zyrtarit të MIE-së, në vetizolim Kurti e ministri Reka bashkë me kabinetet e tyre

Kryeministri në detyrë, Albin Kurti ka treguar sot se është futur në vetizolim, për shkak se kishte pasur kontakt me një zyrtar të Ministrisë së Integrimeve Evropiane, i cili ka pasur po ashtu kontakt të ngushtë me një të infektuar me coronavirus.

Mirëpo përveç Kurtit në vetizolim është futur edhe stafi i ngushtë i Zyrës së Kryeministrit. Po ashtu në izolim janë edhe ministri i MIE-së, Blerim Rreka dhe stafi i tij.

Kështu ka bërë të ditur në një prononcim për Telegrafin, zëdhënësi i Qeverisë në detyrë, Përparim Kryeziu.

“Momentalisht jemi të izoluar stafi i ngushtë i kryeministrit në detyrë, me kërkesë dhe rekomandim të Ministrisë së Shëndetësisë, pasi që ekziston dyshimi se njëri nga zyrtarët e Ministrisë së Integrimeve Evropiane, mund të jetë i infektuar duke qenë se së fundmi ka pasur kontakt të ngushtë me një nga personat që tashmë ka rezultuar pozitiv me COVID-19 në testet e fundit. Në vetizolim sikurse kabineti i kryeministrit dhe vetë kryeministri janë edhe ministri i Integrimeve Evropiane bashkë me kabinetin e tij”, ka thënë Kryeziu.

Kryeziu bëri të ditur se tani për tani mostra për testim i është marrë vetëm zyrtarit të MIE-së, dhe se janë pritje të rezultatit, ku pastaj do të shohin sesi do të veprojnë.

Lexo po ashtu Kryeministri Kurti në vetizolim

“Jemi në pritje të rezultatit të testit të zyrtarit të MIE-së, i cili pritet të publikohet sot gjatë pasdites dhe në bazë të rezultatit edhe veprimet tona do të jenë të duhura në përputhje me rekomandimet e Ministrisë së Shëndetësisë dhe Institutit Kombëtar të Shëndetësisë Publike”, u shpreh Kryeziu. /Telegrafi/