Individi, më i fortë se shteti?

Zhvillimi tekniko-teknologjik, shfaqja e ideologjive ekstreme, indoktrinimi i individëve nga këto ideologji përtej kufijve nacional përmes internetit dhe rrjeteve sociale, ka bërë që individi të bëhet më i fortë sesa shteti dhe sfiduesi më i madh i sigurisë në shtet.

Bota me procesin e globalizimit është bërë më e ndërvarur, më e vogël dhe më e pasigurt, kjo pasi që kufijtë dhe diferencat mes shteteve janë tkurrur. Kështu jemi duke u përballur me sfida globale, si epidemitë, ngrohja globale, terrorizmi etj. të cilat mund të zgjidhen vetëm me një bashkëpunim ndërkombëtar. Pra, shteti është bërë më i ndërvarur nga tjetri, siguria dhe mirëqenia e tij varet edhe nga shtetet tjera.

Globalizimi, përveç të mirave që ka sjell, si në aspektin e zhvillimit ekonomik e të lirive individuale, ka zgjuar edhe shumë pakënaqësi tek popujt e ndryshëm, duke kundërshtuar dominimin e kulturës perëndimore në raport me kulturën tradicionale, humbjen e sovranitetit të shtetit, konkurrencën jo luajale nga korporatat multinacionale, si dhe politikat denigruese të FMN-së dhe mekanizmave tjerë ndërkombëtar.

Amerika, si prijëse e këtij sistemi, ka krijuar armiq të rinj dhe kështu ka ushqyer ideologjitë ekstreme dhe nacionalizmat që të zgjohen në kundërshtim të këtij sistemi që, sipas tyre, është sistemi më i keq i cili të varfëritë i bënë edhe me të varfë e të pasurit edhe me të pasur.

Këto grupe, ani pse e kundërshtojnë procesin e globalizimit , ato mjaft mirë shfrytëzojnë dhe fal këtij procesi arrijnë të shtrijnë ideologjinë e tyre në tërë globin, duke krijuar kështu grupe që me një urdhër nga organizatat ku bën pjesë, pa pasur asnjëherë kontakte fizike, binden që të kryejnë sulme terroriste të cilat as shtetet me të forta nuk po munden t’i parandalojnë.

Grupet e tilla kanë një organizim tejet të sofistikuar, ku përmes rrjeteve sociale dhe videove në internet arrijnë të indoktrinojnë individët shpejt. Kështu shtrohet pyetja, se si është e mundur që këto ligjërata disa muajore po sfidojnë shkollimin 15-vjeçar që individët marrin në shkolla? Pra, si është e mundur që njeriu me shkollim mbi 15-vjeçar të bindet për të vrarë njerëz vetëm me disa ligjërata apo thirrje nga grupet terroriste!?

Është kjo një pyetje që kërkon qasje shumëdisiplinare për të ardhur deri tek një përgjigje e saktë.

Së pari duhet të ndalemi tek lloji i mjeteve që përdorin këto ideologji, për të bindur individët. Këto grupe përdorin besimin fetar si anën më të ndjeshme të besimtarëve, duke proklamuar veprimet e tyre në emër të ruajtjes së identitetit të tyre fetar; pastaj mungesa e rolit edukues (shkollat nuk arrijnë të vetëdijesojnë individët që nuk duhet vrarë) që duhet të luajnë shkollat; mos aftësia e shtetit për t’u kujdesur për mirëqenien e individëve (këta individ kërkojnë mbështetje tek këto grupe të cilat kanë kohezion të madh social); si dhe mungesa e një organizimi të mirëfilltë të jetës së individëve me një laramani aktivitetesh të cilat nuk lënë kohë për aktivitete të tjera ilegale (siç e thotë edhe Michel Foucault, njerëzit nuk lindin kriminelë, shoqëria është ajo që i bënë të tillë).

Pra, sot vëmendja është tek individi, tek aftësia e tij që të shkatërrojë gjithçka në emër të ideologjisë që i përket, duke sfiduar kështu sigurinë e shtetit më shumë sesa armiqtë shtetëror të jashtëm. Kjo do të thotë se procesi i globalizimit vetë i ka ushqyer këtë ideologji dhe tani është shumë sfidues reduktimi apo zhdukja e këtyre ideologjive ekstreme.