IDF: Hezbollahu fsheh 500 milionë dollarë dhe ar në një bunker nën spitalin e Bejrutit

Forcat Mbrojtëse të Izraelit të hënën deklasifikuan informacione nga inteligjenca mbi qendrën financiare të grupit terrorist Hezbollah, duke përfshirë një bunker të fshehur nën një spital në Bejrutin jugor që sipas izraelitëve përmban qindra miliona dollarë në para dhe ar.

Izraeli zgjeroi fushatën e tij kundër Hezbollahut të dielën mbrëma, duke nisur një seri sulmesh për të dobësuar aftësinë e grupit terrorist të mbështetur nga Irani për të financuar operacionet e tij, transmeton Telegrafi.

“Forcat ajrore izraelite kryen një seri të sulmeve precize mbi qendrën financiare të Hezbollahut”, tha zëdhënësi i IDF-së, Daniel Hagari.

“Një nga objektivat tona kryesore mbrëmë ishte një kasafortë nëntokësore me dhjetëra miliona dollarë në para dhe ar. Paratë po përdoreshin për të financuar sulmet e Hezbollahut ndaj Izraelit”, tha ai, pa specifikuar nëse të gjitha paratë u shkatërruan në sulm.

Hagari më pas iu referua një bunkeri të veçantë të mbushur gjithashtu me para dhe ar nën një spital në Bejrut, por tha se kasaforta nuk ishte shënjestruar ende nga IDF.

“Sipas vlerësimeve që kemi, ka të paktën gjysmë miliardë dollarë në kartëmonedha dhe ar të ruajtur në këtë bunker. Këto para ende mund të përdoren për të rindërtuar shtetin e Libanit”, tha Hagari.

Gjatë konferencës, Hagari prezantoi një hartë që tregon vendndodhjen e bunkerit, nën spitalin Al-Sahel në periferinë jugore të Bejrutit të njohur si Dahiyeh, ku Hezbollahu është kryesisht i bazuar.

Ai u bëri thirrje autoriteteve libaneze dhe organizatave ndërkombëtare që të parandalojnë Hezbollahun nga përdorimi i “parave për terror dhe për të sulmuar Izraelin”, dhe paralajmëroi se forcat ajrore izraelite po monitorojnë kompleksin. /Telegrafi/

“Tonight, I am going to declassify intelligence on a site that we did not strike—where Hezbollah has millions of dollars in gold and cash—in Hassan Nasrallah’s bunker. Where is the bunker located? Directly under Al-Sahel Hospital in the heart of Beirut.”

Listen to IDF Spox.… pic.twitter.com/SjMZQpKqoJ

— Israel Defense Forces (@IDF) October 21, 2024