Tre persona ia grabisin me forcë çantën një femre në Fushë Kosovë, gjithçka filmohet nga kamera

Tre persona janë arrestuar në Fushë Kosovë, pasi të njëjtit sot me forcë ia kanë grabitur një gruaje një çantë krahu.

Në njoftimin e Policisë së Kosovës thuhet se njësitet policore të stacionit të Fushë Kosovës, sot kanë arrestuar tre persona të dyshuar për grabitje.

“Rasti ka ndodhur sot në ora 00:10 në lagjen Dardania në Fushë Kosovë, ku ankueses (femër) me forcë i është grabitur një çantë krahu (me dokumente, para e gjëra personale)”, thuhet në njoftim.

Më tej thuhet se puna e hetuesve të stacionit policor të Fushë Kosovës, është finalizuar sot, ku pas marrjes së disa veprimeve operative e hetimore, kanë arrit që të identifikojnë dhe arrestojnë tre persona të dyshuar, transmeton Telegrafi.

Gjësendet e grabitura nga çanta e viktimës

“Personat e dyshuar me rekomandimin e prokurorit të shteti janë ndaluar në mbajtje, përderisa hetuesit po kryejnë të gjitha veprimet e nevojshme hetimore e procedurale lidhur me rastin”, njofton Policia.

Mirëpo, për fatin e keq të grabitësve gjithçka është filmuar nga kamera e sigurisë në një objekt. Telegrafi ka siguruar videon e momentit kur të dyshuarit ia grabisin çantën femrës e cila po ecte e shoqëruar nga një femër tjetër. /Telegrafi/