Haxhiu thotë se Thaçi e Kurti janë takuar edhe dy herë dhe kanë biseduar gjatë

Presidenti Hashim Thaçi dhe kryetari i Lëvizjes Vetëvendosje, Albin Kurti janë takuar edhe dy herë të tjera, përveç takimit zyrtar në Presidencë për konsultimet për formimin e Qeverisë.

“Hashim Thaçi dhe Albin Kurti janë takuar dy herë. Dhe kanë biseduar gjatë”, ka thënë opinionisti Baton Haxhiu, në Info Magazine të Klan Kosovës.

Haxhiu ka thënë se Lëvizja Vetëvendosje dhe LDK nuk do të duhej t’i zgjatnin kaq gjatë negociatat për formimin e Qeverisë, pas harmonizimit të programit qeverisës.

“Ata që i kanë 60 vota dhe 70 e sa deputetë me minoritetet nuk do të duhej ta zgjatnin këtë cikël takimesh as për dhjetë ditë. Arsyeja e parë: e kanë shumicën; arsyeja e dytë: populli i Kosovës e do ndryshimin dhe arsyeja e tretë është se kanë qenë të gatshëm që të shkojnë edhe në koalicion parazgjedhor. Nuk do të duhej të përmendim arsye tjera pse negociatat po zgjasin kaq shumë”.

Haxhiu ka theksuar se Lëvizja Vetëvendosje si fituese e zgjedhjeve të 6 tetorit duhet të jetë më duarlirë në negociatat me LDK-në.

“Vonesën e bën gjithmonë fituesi. Ai duhet të jetë më tolerant. Për faktin se është përcaktuar për koalicion me një parti që përcakton ndryshimin, atëherë natyrshëm toleranca i përket partisë fituese, sikurse fajësia”, ka thënë Haxhiu.