Haradinaj-Stublla ia përkujton Hoxhajt: Merkel dhe Haradinaj ‘luftuan’ kundër ndarjes së Kosovës

Ministrja në detyrë e Punëve të Jashtme, Meliza Haradinaj-Stublla, i është kundërpërgjigjur kandidatit për kryeministër nga Partia Demokratike e Kosovës, Enver Hoxhajt, i cili ka thënë se ish-kryeministri Ramush Haradinaj ia ka prishur Kosovës punët me Evropën.

Haradinaj-Stublla, përmes një postimi në Facebook, ka thënë se kancelarja gjermane Angela Merkel ‘luftoi’ krah për krah me Ramush Haradinajn kundër aventurës së PDK-së për ndarjen e Kosovës.

“Deklarata e djeshme e ushtruesit të detyrës partiak e konfirmon se ndarja e Kosovës mbetet ende në agjendën e tyre, si trashëgimi e vazhdueshme politike, po njësoj si në kohën e korrigjimit të kufijve dhe presionit të brendshëm për heqje të taksës 100%. Le t’ia kujtojmë atij sot e të tjerëve nesër, se kush në të vërtetë na i prishi punët me Evropën në kohën kur Angela Merkel ‘luftoi’ krah për krah me Kryeministrin Ramush Haradinaj kundër aventurës së tyre për ndarjen e Kosovës! Populli nuk harron.

Keqardhje për disa njerëz që asnjëherë nuk arrijnë të dalin nga petku i ushtruesit të detyrës”, ka shkruar Haradinaj-Stublla.

Ndryshe, kandidati PDK-së për kryeministër, Enever Hoxhaj, të shtunën në Gjilan ka thënë se “Ne nuk mundemi më me pas kryeministra ku njëri merr në thua dhe na prish me Evropën qysh na pati prishur Ramush Haradinaj. Ia merrte mendja që mund të shtyhet me Angela Merkel dhe me Macron dhe i la të rinjtë, të rejat e Gjilanit dhe krejt qytetarët e Kosovës pa viza. Apo Albini i cili na prishi me Amerikën. Ne nuk jemi, as Kinë, as Rusia, as Gjermania, e cila mund të bartë këtë barrë. Neve na duhet një politikë e mençur, neve na duhet t’i ruajmë arritjet që i kemi arritur deri tash bashkë”.

Ndaj deklaratës së Hoxhajt ka reaguar edhe sh- deputetja e Kuvendit nga radhët e Aleancës për Ardhmërinë e Kosovës (AAK), që synon edhe për një mandat në legjislativin e vendit, Time Kadrijaj.

Ajo ka thënë se kandidati i Partisë Demokratike të Kosovës (PDK), Enver Hoxhaj gjatë karrierës së tij është ankuar vazhdimisht për bashkëpartiakët e tij nga UÇK-ja.

Kadrijaj ,përmes një postimi në llogarinë e saj në Facebook, e ka quajtur hajgarexhi Hoxhajn.