Haradinaj në Suharekë: Krenar që produkti 100% Kosovë sot dominon në treg

Kryeministri në detyrë, Ramush Haradinaj ka marrë pjesë sot në Festivalin Festari, që mbahet në Therandë.

Ai ka thënë se ky është manifestimi më i bukur i mënyrës së jetesës në Kosovë, duke shfaqur identitetin e qytetarëve.

“Festa e artë dhe e rinisë në Therandë, i nxjerr në dritë vlerat tona më të çmuara dhe është manifestimi më i bukur i mënyrës së jetesës në vendin tonë dhe i asaj se kush jemi. Kënaqësi të ndaja sot gëzimin me qytetarët e Therandës në Festivalin Festari”, ka deklaruar Haradinaj, thuhet në njoftimin për media.

Kryeministri Haradinaj ka thënë se ka uruar të gjithë bujqit për të arriturat e tyre.

“Në këtë ditë feste gjatë panairit të prodhimeve bujqësore urova bujqit për të gjitha të arriturat e tyre, pashë nga afër artefakte të llojllojshme arkeologjike e etnografike në Muzeun e Qytetit dhe u bashkova në aktivitetet e shoqërive kulturore dhe të të rinjve. Krenar që produkti 100% Kosovë, sot dominon tregun tonë, falë punës së vyer të prodhuesve tanë dhe masave mbrojtëse të Qeverisë për prodhimin vendor”, ka shkruar ai në fund.

Haradinaj ka marrë pjesë po ashtu edhe në vjeljen e rrushit.

Haradinaj ka thënë se ishte ndjenjë e veçantë të përcillte nga afër gëzimin e vreshtarëve për vjeljen e rrushit.

“Festa e vjeljes së rrushit shpalos traditat më të bukura mijëvjeçare në Therandë, e cila tashmë ka depërtuar në tregjet globale me verërat e saj cilësore dhe brendet e njohura, që pos se i japin vendit tonë impuls të rritjes ekonomike, e bëjnë pjesë të guidave turistike. Gjatë festivalit Festari, ndjenjë e veçantë të isha pjesë e përcjelljes së gëzimit të vreshtarëve me vjeljen e rrushit si dhe degustimit të verërave të mrekullueshme të kësaj ane”, ka shkruar Haradinaj në Facebook. /Telegrafi/