Haradinaj: Mirënjohës përzemërsisht 66, 256 votuesve të Aleancës

Pas publikimit të rezultateve përfundimtare të zgjedhjeve parlamentare të 9 shkurtit, ka reaguar kryetari i AAK-së, Ramush Haradinaj.

Haradinaj ka thënë se tashmë është deklaruar se ka pritur një rezultat më të mirë në zgjedhje.

“Kemi garuar me një vizion të qartë, atë të sigurisë, prej të cilit do të derivonin edhe siguria ekonomike dhe mirëqenia e qytetarit të Republikës së Kosovës. Tashmë jemi deklaruar se rezultatin e kemi pritur ndryshe, por kjo asnjëherë nuk do të thotë se harrojmë të ju jemi mirënjohës përzemërsisht 66 mijë e 256 votuesve të Aleancës”, ka shkruar Haradinaj, në Facebook.

“E dimë saktë se, sado që jemi në numër dhe përfaqësim, nuk do të rreshtim së punuari për një Kosovë të sigurt, të zhvilluar e të avancuar ndërkombëtarisht”.

Tutje kreu i AAK-së tha se “Do të jemi këtu, gjithmonë në shërbimin e secilit qytetar, pa përjashtim. Aleanca ka qenë dhe është në kontratë të përjetshme vetëm me qytetarin e Kosovës”.

“Kosovë, paç ditë të bardha përpara!”, ka shkruar ai.

Komisioni Qendror i Zgjedhjeve (KQZ) në Kosovë e ka miratuar të shtunën rezultatin përfundimtar të zgjedhjeve parlamentare të 9 shkurtit, në të cilin prin Lëvizja Vetëvendosje me 42.30 për qind të votave. E dyta ka dalë Partia Demokratike e Kosovës (PDK) me 20.95 për qind, pasuar nga Lidhja Demokratike e Kosovës me 18.27 për qind.

Në vendin e katërt është koalicioni mes Aleancës për Ardhmërinë e Kosovës dhe Nismës Social-demokrate me 7.06 për qind të votave.

Me këto përqindje, LVV-ja i ka siguruar 48 ulëse në Kuvendin e Kosovës, PDK-ja, 24 sosh, LDK, 20 vende, Lista Serbe nëntë vende dhe koalicioni AAK-Nisma, tetë vende. /Telegrafi/