Haradinaj: Delegatëve të 2 Korrikut do t’u njihet statusi i deputetit

Kandidati për kryeministër nga koalicioni PAN, Ramush Haradinaj, ka thënë se delegatëve të Deklaratës së Pavarësisë së 2 Korrikut 1990, do t’u njihet statusi i deputetit dhe të gjitha privilegjet që nënkupton ky status.

Me  rastin e 27 vjetorit të Deklaratës së 2 Korrikut, Haradinaj përmes një postimi në Facebook, ka thënë se ky ishte hapi i parë formal drejt pavarësimit të Kosovës,  transmeton Telegrafi.

Postimi i plotë i Haradinajt:

“Ata janë delegatët e “2 Korrikut të Pavarësisë”

Sot është përvjetori i Deklaratës së 2 Korrikut, me të cilën u bë edhe hapi i parë formal drejt pavarësimit të Kosovë.

111 delegatë të Kuvendit të Kosovës, në kushte shtetrrethimi, patën guximin ta vendosin gurin e parë në themelin e një shteti që ishte nisur rrugës së pavarësisë.

Për fat të keq, ky hap sublim i tyre, asnjëherë nuk u vlerësua, sa e si duhet.

Këta delegatë, që pak më vonë miratuan edhe Kushtetutën e Kaçanikut, në historinë e Kosovës do të mbeten “Delegatë të Pavarësisë”, prandaj atyre edhe do tu njihet statusi e deputetit dhe të gjitha privilegjet që nënkupton ky status.

Deklarata e 2 Korrikut e vitit 1990, duhet të ruhet në kujtesën tonë, si ndër të rrallat ngjarje që e bënë historinë e Kosovës”, ka shkruar Haradinaj. /Telegrafi/