Një rrugë e madhe që lidh tre shtetet baltike me Poloninë u hap të hënën në një kohë tensionesh në rritje midis Evropës dhe Rusisë.
Rruga, e njohur si Via Baltica, do të kalojë nëpër një rrip të ngushtë toke midis Bjellorusisë dhe enklavës ruse të Kaliningradit të quajtur Hendeku Suwalki, i cili shpesh është përshkruar si një objektiv i mundshëm nëse Rusia do të sulmonte NATO-n.
Në një ceremoni inaugurimi në kufirin midis vendeve të tyre të hënën, presidenti polak Karol Nawrocki dhe presidenti lituanez Gitanas Nausëda thanë se rruga ishte korridori më i rëndësishëm i rajonit dhe theksuan rolin e saj në mbrojtjen e rajonit.
Trupat e NATO-s mund të lëvizin potencialisht më shpejt në ndihmë të vendeve baltike duke përdorur Via Baltica, transmeton Telegrafi.
"Kjo rrugë ka një qëllim të dyfishtë - do të ndihmojë ekonominë tonë dhe do të forcojë aftësitë mbrojtëse të rajonit tonë", tha Nawrocki.
Polonia dhe fqinjët e saj baltikë kanë qenë në gatishmëri të lartë që kur shumë dronë, që mendohet se janë nga Rusia, hynë në territorin polak dhe aeroplanë luftarakë rusë kaluan në hapësirën ajrore të Estonisë në shtator.
Rruga Via Baltica, me gjatësi 970 kilometra, fillon në kryeqytetin e Polonisë, Varshavë, dhe kalon nëpër Lituani, Letoni dhe Estoni, ku përfundon në Talin.
Ndërtimi i pjesës polake të Via Baltica zgjati më shumë se 10 vjet dhe kushtoi më shumë se 11 miliardë zloty (2.6 miliardë euro), nga të cilat pothuajse 1 miliard euro erdhën nga fondet e Bashkimit Evropian.
Është pjesë e rrugës evropiane E67, e cila lidh Finlandën me Republikën Çeke.
Autostrada A5 me katër korsi që lidh Kaunasin, qytetin e dytë më të madh të Lituanisë, me Suwalkin në Poloni është gjithashtu pjesë e Via Baltica.
Disa seksione në veri të Via Baltica janë ende vetëm me dy korsi dhe do të zgjerohen më vonë, tha Ministria e Transportit e Lituanisë në një deklaratë.
Nausëda tha se rruga simbolizon "lirinë, prosperitetin dhe sigurinë" dhe se "luan një rol jashtëzakonisht të rëndësishëm ekonomik, tregtar dhe logjistik në Lituani, duke na lidhur me pjesën tjetër të tregut evropian".
Gjithashtu në ndërtim e sipër është një projekt hekurudhor shoqërues, i njohur si Rail Baltica, pjesët e para të të cilit pritet të jenë funksionale deri në vitin 2030.
Ndërtimi i linjës së re hekurudhore prej 870 kilometrash, që shkon nga Talini deri në kufirin polak, filloi në vitin 2019, por është shoqëruar nga vonesa dhe mosmarrëveshje midis qeverive baltike mbi itinerarin e linjës.
Ka pasur gjithashtu probleme nga Komisioni Evropian, i cili e konsideron çmimin, me kosto që katërfishohen nga 6 miliardë euro fillestare në 24 miliardë euro, shumë të lartë. /Telegrafi/
- YouTube www.youtube.com
