Hamasi njofton se kur do t’i përgjigjet propozimit izraelit për një armëpushim të mundshëm

Hamasi do t’i përgjigjet propozimit të fundit izraelit për një armëpushim brenda 48 orëve të ardhshme.

Bëhet e ditur se shteti hebraik kërkon lirimin e 33 grave, fëmijëve, të moshuarve dhe të sëmurëve, ndërsa Hamasi pretendon se mban peng vetëm 20 prej tyre.

Por, Izraeli ka deklaruar se kërkesa e tij për lirimin e pengjeve është kusht i padiskutueshëm dhe nëse nuk zbatohet atëherë kërcënon me sulm në Rafah.

Madje, në afërsi të qytetit janë parë mjete të blinduara në gatishmëri për sulm, shkruan euronews, përcjell Telegrafi.

E nëse Izraeli hyn në Rafah, ofensiva mund të shkaktojë dëme të mëdha pasi qyteti është i mbipopulluar me refugjatë.

Lexo po ashtu Hamasi "po shqyrton propozimin e fundit të Izraelit për armëpushim në Gazë"

Kryeministri izraelit, Benjamin Netanyahu, tha se as vendimet e Gjykatës Ndërkombëtare Penale nuk do të ndikojnë në veprimet ushtarake të Izraelit.

Netanyahu e tha këtë duke iu referuar informacionit të publikuar së fundmi në lidhje me mundësitë e një vendimi nga Gjykata në Hagë për një urdhërarrest për Netanyahun dhe politikanë të tjerë.

Ndryshe, raportohet se në Gazë kanë mbërritur më shumë ndihma humanitare.

Përballë presionit ndërkombëtar, Izraeli ka ndihmuar në depërtimin e ndihmave humanitare në territoret palestineze.

Ushtria izraelite ka publikuar edhe një video të ndërtimit në vazhdim të bazës lundruese amerikane, e synuar për të dërguar ndihmë nga deti drejt tokave palestineze. /Telegrafi/