LAJMI I FUNDIT:

Haliti thotë se politika dhe kryeprokurori i shtetit u organizuan ta eliminonin nga gara për deputet

Haliti thotë se politika dhe kryeprokurori i shtetit u organizuan ta eliminonin nga gara për deputet

Deputeti i PDK-së, Xhavit Haliti ka thënë se gjithë procesi gjyqësor ndaj tij është nisur me qëllim që ta eliminojnë nga mundësia për t’u zgjedhur deputet. Ai ka thënë se ky organizim kundër tij është bërë nga politika dhe nga kryeprokurori i shtetit.

Këtë deklarim i akuzuari Haliti e ka dhënë në fjalën përfundimtare në rastin ku po akuzohet për sulm ndaj deputetit të LDK-së, Arben Gashi që kishte ndodhur në maj 2018 në sallën ku mbahen seanca plenare të Kuvendit të Kosovës.

“Ata që kanë pas për qëllim edhe në të kalumen edhe procesin kur e kanë fillu të më eliminojnë nga mundësia për t’u zgjedhur si deputet përkatësisht për të marrë pjesë në garë, ka qenë një akt i kombinuar dhe i organizuar edhe nga politika, edhe nga kryeprokurori i shtetit. Ata që e kanë urdhëruar kryeprokurorin e shtetit”, ka thënë i akuzuari Haliti, raporton “Betimi për Drejtësi”.


Haliti nuk ka përmendur emra se kush ishte organizuar kundër tij derisa në kohën kur kishte ndodhur rasti në Kuvend, Kryeprokuror i Shtetit ka qenë Aleksander Lumezi derisa në pushteti ishte koalicioni i PAN-it, ku bënte pjesë edhe PDK-ja derisa kryeministër ishte Ramush Haradinaj.

Sidoqoftë, tha se ajo çka ka ndodhur nuk ka qenë e qëllimshme dhe se beson që gjykata do të marrë vendimin e duhur nëse ai është fajtor.

“Të gjithë jemi të barabartë para ligjit, jom mbështetës i kësaj ideje, kom luftu për këtë dhe edhe kundër vetvetes qoftë se duhet mu deklaru”, ka shtuar ai.

Haliti në konsultim me avokatin e tij, Kujtim Kërveshi, ka hequr dorë nga ankesa për ta përjashtuar gjykatësin nga lënda me arsyetimin se nuk dëshirojnë të zvarrisin procesin gjyqësor.

Në anën tjetër, në fjalën përfundimtare, prokurori i shtetit Besnik Jakupi ka deklaruar se prokuroria konsideron se me rastin e administrimit të provave personale dhe materiale, në mënyrë të plotë është vërtetuar se i akuzuari ka kryer veprën penale në kohë, vend dhe mënyrë të përshkruar si në dispozitivin e aktakuzës.

Sipas prokurorit Jakupit, gjendja faktike në tërësi u vërtetua nga prova materiale siç është video incizimi duke kërkuar nga gjykata që të akuzuarin ta shpall fajtor dhe ta dënoj sipas ligjit.

Kurse, përfaqësuesi i palës së dëmtuar, avokati Ahmet Tahiri ka mbështetur fjalën përfundimtare të dhënë nga prokurori i shtetit duke shtuar se gjatë këtij shqyrtimi gjyqësor është vërtetuar përtej çdo dyshimi të bazuar mirë se i akuzuari ka kryer veprën penale për të cilën akuzohet.

I njëjti ka kërkuar nga gjykata që të akuzuarin ta shpall fajtor dhe ta dënojë sipas ligjit në atë mënyrë që edhe në publik të dërgohet mesazh i drejtë se të gjithë jemi të barabartë para ligjit.

Në anën tjetër, avokati Kërveshi tha se fjalën e tij përfundimtare e ka përgatitur me shkrim duke e elaboruar të njëjtën.

Ai tha se fjala përfundimtare e prokurorit dhe e përfaqësuesit të palës së dëmtuar nuk është në përputhje me vet deklarimin e palës së dëmtuar dhe se prova në shqyrtim nuk janë thënie të prokurorit e as përfaqësuesit të palës së dëmtuar por janë deklarimet e sakta dhe autentike të palës së dëmtuar.

Sipas avokatit Kërveshi, duke qenë se po kërkohet që ky gjykim të jetë mesazh publik, gjykimet me mesazhe publike janë dhënë në kohën e tjera

“Sidomos në pjesën ku jetojmë përveç në vendet e tiranisë aty ku është zbatuar Konventa për të Drejtat e Njeriut, gjykimet nuk bëhen në publik. Organi i akuzës ka parashtruar një aktakuzë ku arsyetimin e të njëjtës e ka në shpërputhje me provat të cilat i ka propozu”, tha avokati Kërveshi.

Ndryshe, më 16 janar 2024, kryetarja e Gjykatës Themelore në Prishtinë, Albina Shabani-Rama e ka refuzuar kërkesën e mbrojtësit të deputetit të Partisë Demokratike të Kosovës (PDK), Xhavit Haliti, avokatit Kujtim Kërveshi, për përjashtimin e gjykatësit Driton Berisha nga rasti ku Haliti akuzohet për sulm ndaj deputetit të Lidhjes Demokratike të Kosovës (LDK), Arben Gashi, që kishte ndodhur në maj të 2018-ës.

Kurse, ky rast më parë ishte gjykuar nga gjykatësja Sulltane Hoti, mirëpo pas kalimit të saj në Departamentin e Krimeve të Rënda, tani gjykohet nga gjyqtari Driton Berisha.

Në tetor të 2019-ës, Gjykata Themelore në Prishtinë sipas urdhrit ndëshkimor, i kishte dënuar me nga 1 mijë e 250 euro gjobë deputetin e PDK-së, Xhavit Haliti (për “Sulm”) dhe ish-deputetin e AAK-së, Gani Dreshaj (për “Kanosje”), të deputetit të LDK-së, Arben Gashi.

Për Dreshajn, gjyqtari Berisha tha se e ka pranuar urdhrin dhe ka bërë kërkesë për kthim në gjendjen e mëparshme për ta zënë afatin për kundërshtim, por bazuar në shkresat e lëndës, nuk ka vendim për atë kërkesë nga gjyqtarja Hoti.

Ndryshe, sipas aktakuzës së ngritur në maj të vitit 2019 nga Prokuroria Themelore në Prishtinë, i akuzuari Xhavit Haliti më 18 maj 2018 në Kuvendin e Kosovës në Prishtinë me dashje ka sulmuar deputetin- tani të dëmtuarin Arben Gashi, duke e shtyrë me krahë dhe bërryl në gjoks.

Me këtë, Haliti po akuzohet se ka kryer veprën penale “Sulmi” nga neni 187, par.1 të Kodit Penal, vepër kjo e dënueshme me gjobë ose me burgim deri në tre vjet.

Ndërsa, deputeti Gani Dreshaj thuhet se po të njëjtën ditë, me dashje, e kishte kanosur deputetin Gashi me fjalët “Kom me ta prish fytyrën”.

Në trend Lajme

Më shumë
Hoxhaj: Kriminelët serbë nga veriu i Kosovës, të përfshirë në planet e vrasjes së Gjukanoviqit

Hoxhaj: Kriminelët serbë nga veriu i Kosovës, të përfshirë në planet e vrasjes së Gjukanoviqit

Lajme
Sveçla dënon sulmin që ndodhi në një lokal në veri: Rendi e ligji do të triumfojnë me çdo kusht mbi terrorin

Sveçla dënon sulmin që ndodhi në një lokal në veri: Rendi e ligji do të triumfojnë me çdo kusht mbi terrorin

Lajme
Këto janë 10 plazhet më të bukura shqiptare sipas revistës

Këto janë 10 plazhet më të bukura shqiptare sipas revistës "Condé Nast Traveler"

Lajme
Jo temperaturat, por çmimet 'përvëluese' boshatisin plazhet në Shqipëri

Jo temperaturat, por çmimet 'përvëluese' boshatisin plazhet në Shqipëri

Lajme
Haradinaj: Gjithçka që ndërton Kurti është në themelet e tjetërkujt

Haradinaj: Gjithçka që ndërton Kurti është në themelet e tjetërkujt

Lajme
Temperaturat deri 39 gradë Celisus në javën e tretë të korrikut, IHMK bën apel për kujdes

Temperaturat deri 39 gradë Celisus në javën e tretë të korrikut, IHMK bën apel për kujdes

Lajme
Kalo në kategori