Kandidati për deputet nga radhët e Partisë Demokratike të Kosovës, Xhavit Haliti, ka reaguar pas tubimit të PDK-së të mbajtur në Prizren, ku pranoi flamurin e Ushtrisë Çlirimtare të Kosovës.
Përmes një postimi në rrjetet sociale, Haliti tha se flamurin e UÇK-së e pranoi me krenari dhe emocion të veçantë, duke e cilësuar atë si amanet lirie, simbol sakrifice dhe nder të përjetshëm të Kosovës.
Ai theksoi se vlerat e luftës çlirimtare mbeten themel i shtetësisë së Kosovës dhe se ato duhet të ruhen e respektohen nga të gjitha gjeneratat, veçanërisht në proceset e rëndësishme demokratike, siç janë zgjedhjet e jashtëzakonshme parlamentare të 28 dhjetorit.
Tubimi në Prizren u zhvillua në kuadër të fushatës zgjedhore të PDK-së, ku u përcollën mesazhe për unitet, respektim të vlerave të luftës dhe angazhim për zhvillimin e vendit.
